ខេត្តត្បូងឃ្មុំ ៖ កម្លាំងនគរបាលប្រឆាំងគ្រឿងញៀនស្រុកមេមត់ បានចុះឃាត់ខ្លួនយុវជនម្នាក់ បន្ទាប់ពីទទួលព័ត៌មានពីប្រជាពលរដ្ឋ ពីករណីជនសង្ស័យកំពុងប្រើប្រាស់ និងរក្សាទុក ជួញដូរគ្រឿងញៀន នៅចំណុចចំការកៅស៊ូខាងជើងភូមិចំងាយប្រហែល២គីឡូម៉ែត្រ ស្ថិតក្នុងភូមិណង់ក្រពើ ឃុំមេមត់ ស្រុកមេមត់ ខេត្តត្បូងឃ្មុំ ។
ការឃាត់ខ្លួនយុវជនរូបនេះធ្វើឡើងកាលពីនៅវេលាម៉ោង១២ និង១៥នាទី ថ្ងៃទី ២៤ ខែមេសា ឆ្នាំ២០១៨ បន្ទាប់ពីប្រជាពលរដ្ឋបានរាយការណ៍ ខណៈពួកគាត់ធ្វើដំណើរបេះបន្លែឈើព្រៃនៅចំណុចខាងលើ ។
មន្ត្រីនគរបាលប្រឆាំងគ្រឿងញៀនស្រុកមេមត់ ដែលបានចុះសហការជាមួយកម្លាំងនគរបាលប៉ុស្តិ៍រដ្ឋបាលមេមត់ បានអោយ ដឹងថា ជនសង្ស័យឈ្មោះ ចាន់ វិបុល ភេទប្រុស អាយុ ៣៤ឆ្នាំ រស់នៅភូមិដកពរ ឃុំទ្រៀក ស្រុកមេមត់ ខេត្តត្បូងឃ្មុំ ។ ក្នុងនោះ ធ្វើការឆែកឆេររកឃើញនូវម្សៅក្រាមពណ៌សសង្ស័យជាគ្រឿង ញៀនចំនួន២ កញ្ចប់ធំ និង១កញ្ចប់តូច និងឧបករណ៍ជក់ រួចបញ្ជូនមកកាន់អធិការដ្ឋាននគរបាលស្រុកមេមត់ ដើម្បីធ្វើការសាក សួរបន្ត និងកសាងសំណុំរឿងទៅតាមនីតិវិធីច្បាប់ ។
បច្ចុប្បន្នជនសង្ស័យខាងលើនោះ ព្រមទាំងវត្ថុតាងថ្នាំញៀន ០២ កញ្ចប់ធំ និង ០១ កញ្ចប់តូច ត្រូវបានសមត្ថកិច្ចជំនាញនៃផ្នែកប្រឆាំងបទល្មើសគ្រឿងញៀនស្រុកមេមត់ បានកសាងសុំណុំរឿងរួចបញ្ជូនខ្លួនទៅឲ្យតុលាការខេត្តត្បូងឃ្មុំ ដើម្បីចាត់ការតាមច្បាប់ ៕ វណ្ណៈ
