ខេត្តត្បូងឃ្មុំ ៖ គ្រោះថ្នាក់ចរាចរណ៍ផ្តើមឡើងដោយការបើក បរមិនប្រកាន់ស្តាំ បានកើតឡើងរវាងរថយន្តបុកគ្នាជាមួយម៉ូតូបណ្តាលអោយភាគីម៉ូតូបាត់បង់អាយុជីវិតនៅនឹងកន្លែង ។
ប្រភពព័ត៌មានបានឲ្យដឹងថា គ្រោះថ្នាក់ចរាចរណ៍ខាងលើនេះ កើតឡើងកាលពីថ្ងៃពុធ ១១កើត ខែពិសាខ ឆ្នាំច សំរិទ្ធិស័ក ព.ស ២៥៦១ ត្រូវនិងថ្ងៃទី២៥ ខែមេសា ២០១៨ វេលាម៉ោង ១៤ និង ៥០នាទី លើផ្លូវជាតិលេខ៧ ចំណុចមុខមន្ទីពេទ្យព្រះនរោត្តមសីហនុ ត្រង់ចន្លោះបង្គោលគីឡូម៉ែត្រ ១៤៦-១៤៧ ស្ថិតនៅភូមិជ្រៃបិទមាស សង្កាត់សួង ក្រុងសួង ខេត្តត្បូងឃ្មុំ ។
សមត្ថកិច្ចបានអោយដឹងថា ថ្ងៃកើតហេតុជនរងគ្រោះបើកម៉ូតូពីសួងទៅក្រែក (លិច-កើត) រថយន្តបើកបរពីក្រែកមកសួង (កើត-លិច) ។ គ្រោះថ្នាក់នេះផ្តើមឡើងដោយភាគីរថយន្ត បើកបរមិនគោរពប្រកាន់ស្តាំដៃ ។ សមត្ថកិច្ចបន្តថា រថយន្តម៉ាកហ៊ីយ៉ាន់ដាយ ព៌ណ ស (ប្រភេទបែនចំណុះ ៥តោន) ស្លាកលេខ កំពង់ចាម3A-2219 អ្នកបើកបរមិនស្គាល់ឈ្មោះនិងអាស័យដ្ឋាន (ក្រោយពេលកើតហេតុរត់គេចខ្លួនបាត់) ។
ចំណែកជនរងគ្រោះឈ្មោះ ផុង ម៉ាលីស ភេទ ប្រុស អាយុ ៣៣ឆ្នាំ នៅភូមិធ្លក សង្កាត់សួង ក្រុងសួង ខេត្តត្បូងឃ្មុំ បើក បរម៉ូតូម៉ាកវ៉េវឆ្លាម ពណ៌ខ្មៅ ពាក់ស្លាកលេខ ភ្នំពេញ 1T.6799 បណ្តាលអោយស្លាប់នៅហ្នឹងកន្លែងកើតហេតុ ។
ក្រោយកើតហេតុ កម្លាំងសមត្ថកិច្ចនគរបាលចរាចរណ៍បានចុះ មកវាស់វែងតាមជំនាញ ខណៈសព ប្រគល់ជូនក្រុមគ្រួសារយកទៅធ្វើបុណ្យតាមប្រពៃណី ។ រីឯវត្ថុតាងទាំងពីរជំនាញយកមករក្សាទុកនៅអធិការដ្ឋាននគរបាលក្រុងសួង ដើម្បីចងក្រង សំណុំរឿងតាមនីតិវិធី៕ វណ្ណៈ
