ភ្នំពេញ៖ ប្តីប្រពន្ធវ័យក្មេងបានប្រតាយប្រតប់គ្នានៅក្បែរផ្សារស្ទឹងមានជ័យថ្មីបង្កការភ្ញាក់ផ្អើលនាំឲ្យ មានការកក់ស្ទះចរាចរណ៍ ដែលប្រជាពលរដ្ឋអ្នកធ្វើដំណើរឆ្លងកាត់ស្មានជាករណីគ្រោះថ្នាក់ចរាចរ តែតាមការពិតជារឿងប្តីតាមទាន់ប្រពន្ធរបស់ខ្លួនផឹតក្បត់មានប្រុសផ្សេងឌុបគ្នាមកចូលលេងផ្សារ ស្ទឹងមានជ័យថ្មីសោះ។
ហេតុការណ៍ភ្ញាក់ផ្អើលនេះបានកើតឡើងនៅវេលាម៉ោង៧និង៤៥នាទីយប់ថ្ងៃទី៩ ខែវិច្ឆកា ឆ្នាំ២០១៥ នៅលើកំណាត់ផ្លូវព្រះមុនីរ៉េត ត្រង់ចំណុចផ្សារស្ទឹងមានជ័យថ្មី សង្កាត់ស្ទឹងមានជ័យ ខណ្ឌមានជ័យ។
បុរសជាប្តីបានប្រាប់គេឯងថា ប្រពន្ធរបស់ខ្លួនបានរៀបការត្រឹមត្រូវតាមច្បាប់ ហើយពុំទាន់ បានលែងលះគ្នានៅឡើយទេ។ បុរសជាប្តីបន្តថា គាត់បានតាមដានប្រពន្ធរបស់ខ្លួន៣ទៅ៤ខែមក ហើយ ទើបតែពេលនេះគាត់តាមទាន់ប្រពន្ធគាត់មានប្រុសផ្សេងផឹតក្បត់ឌុបគ្នាមកដើរលេងនៅ ផ្សារស្ទឹងមានជ័យថ្មីនេះ។ ចំណែកឯស្ត្រីជាប្រពន្ធក៏បានច្រានចោលថា មិនដូច្នោះទេរូបនាងនិងប្តី បានលែងលះគ្នា៣ខែមកហើយ នាងមិនអាចរស់នៅជាមួយគ្នាបានទេ។ ស្ត្រីដដែលបន្តថា នាង បានហៅឲ្យប្តីនាងទៅសាលាឃុំដើម្បីលែងលះគ្នា តែប្តីនាងមិនព្រមទៅ។
ការជជែកគ្នាបានអូសបន្លាយកាន់តែយូរៗទៅ ធ្វើឲ្យមានការអន្តរាគមន៍ពីនគរបាលប៉ុសិ៍្ត ផងដែរក្នុងគោលបំណងបញ្ចៀសការកកស្ទះចរាចរណ៍។ នគរបាលប្រាប់ដល់ពួកគេថា រឿងនេះ ទាល់តែនាំគ្នាទៅដោះស្រាយនៅសាលាសង្កាត់ចុះ។
ដោយឡែកបុរសពាក់អាវរងាពណ៌ក្រហមត្រូវជាប្រុសសាហាយស្មន់ និងស្ត្រីនោះបានត តាំងតបវិញថា នេះក៏បណ្តាលមកពីប្តីធ្វើបាបប្រពន្ធរបស់ខ្លួនពេកទើបគេសម្រេចចិត្តចុះចោល។
ក្រោយពីមានការអន្តរាគមន៍ពីសមត្ថកិច្ចមូលដ្ឋានពួកគេបានឌុបគ្នាទៅសាលាសង្កាត់ធ្វើ ការដោះស្រាយគ្នា ដើម្បីបញ្ចប់រឿង៕
ដោយ៖ តាឡឹម
