ភ្នំពេញ៖ ថ្មីៗនេះតារាស្រីគង់ វង្សយ៉ាទី បានធ្វើឱ្យអ្នករួមអាជីពមានការភ្ញាក់ផ្អើលខ្លាំង នៅពេលដែលមានព័ត៌មានថា នាងបានផ្លាស់ប្តូររថយន្តទំនើប Lexus LX 570 ពណ៌ខ្មៅ ឆ្នាំ2016 តម្លៃជាង20ម៉ឺនដុល្លារអាមេរិកនោះ ។ នាងបានក្លាយជាតារាស្រីថ្មីដែលមានរថយន្តទំនើបថ្លៃកប់ពពកជិះ បន្ទាប់ពីតារាប្រុសស្រីមួយចំនួនតូចក្នុងចង្កោមអ្នកសិល្បៈ។
គង់ វង្សយ៉ាទី បានផ្លាស់ប្តូររថយន្តទំនើបៗជិះបន្តបន្ទាប់រហូតផ្អើលអស់អ្នកធ្វើការនៅទូរទស្សន៍ CTN និងលាន់មាត់គ្រប់គ្នាថាតារាស្រីរូបនេះពិតជាធូរធារខ្លាំង។ទោះបីជាប្រើប្រាស់របស់ទំនើបៗនិងលុយចាយពេញៗដៃក្តីក៏តារាស្រីរូបនេះនៅមិនទាន់បោះបង់ការងារសិល្បៈពិសេសផ្នែកសម្តែងចោលនោះទេ ប៉ុន្តែនាងបានផ្អាកការសម្តែងមួយរយៈពេលខ្លីបន្ទាប់ពីថតភាពយន្តរឿង “ម៉ែក្មេករើសកូនប្រសា” របស់ទូរទស្សន៍ប៉ុស្តិ៍លេខ៨ និងរឿង “លេខាថ្មី” របស់ប៉ុស្តិ៍លេខ៥ចប់។
នាងថារដូវក្តៅនេះនាងរវល់ច្រើននឹងការងារជាពិធីការិនីនៅតាមបណ្តាខេត្តជាច្រើនទើបសម្រេចចិត្តមិនទាន់ទទួលការងារសម្តែង ប៉ុន្តែនាងអាចនឹងវិលរកការសម្តែងវិញក្រោយការងារជាពិធីករធូរស្រាលបន្តិច។ អ្នកសិល្បៈជាច្រើនបានស្ងើចសរសើរនឹងរបស់ទំនើបថ្មីនេះ រហូតមានអ្នកខ្លះលើកឡើងថាអាចជាកាដូរបស់គូស្នេហ៍ទៀតផង។ ជុំវិញការលើកឡើងនេះ តារាស្រី សាច់ខ្ចី គង់ វង្សយ៉ាទី លើកឡើងថា នាងពិតជាទើបនឹងទិញរថយន្តថ្មីទំនើបនេះមែនប៉ុន្តែ មិនមែនមានលុយទិញផ្តាច់នោះទេគឺជាការបង់រំលោះតែប៉ុណ្ណោះ។
នាងលើកឡើងដែរថា ក្រៅពីរថយន្តនេះអ្នកផ្ទះនាងមានរថយន្ត៤គ្រឿងផ្សេងទៀតដែលសូម្បីតែប្អូនស្រីនាងក៏ជិះរថយន្ត Porsche ដែរ។ នាងថាការផ្លាស់ប្តូររថយន្តថ្មីញឹកញាប់ព្រោះតែសមាជិគ្រួសារនាងច្រើន និងមានការងារមមាញឹកដែលត្រូវការប្រើប្រាស់រថយន្តស្ទើរគ្រប់គ្នា ហើយការផ្លាស់ប្តូររថយន្តគ្នាជិះគឺជារឿងធម្មតាសម្រាប់គ្រួសារនាង។នាងជឿថាតារាជាច្រើនក៏អាចមានលទ្ធភាពជិះរថយន្តទំនើបដូចនាងដែរព្រោះតែពួកគេអាចមានចំណូលពីការងារបានច្រើនសមរម្ភគ្រាដែលលក្ខខណ្ឌបង់រំលោះក៏មិនតឹងតែងខ្លាំងនៅពេលបច្ចុប្បន្ន។
ចំពោះការលើកឡើងថាជាកាដូរបស់គូស្នេហ៍ណាម្នាក់គឺនាងសូមបដិសេធ។ នាងបញ្ជាក់ថា បច្ចុប្បន្នការងារសិល្បៈពិសេសការងារជាពិធីកររបស់នាងមមាញឹកខ្លាំង ដែលអាចឲ្យនាងមានចំណូលគ្រប់គ្រាន់សម្រាប់រ៉ាប់រងការចាយវាយ ទិញ និងបង់រំលោះសម្ភារៈទំនើបៗបានមិនចាំបាច់មានការជួយពីបុរសណាដែរ៕
ដោយ វឌ្ឍនា
