ភ្នំពេញ៖ នារីរូបស្រស់ជាជនជាតិចិនម្នាក់ស្រវឹងបើករថយន្តធុនត្រាមួយគ្រឿងក្នុងល្បឿនលឿនហើយបានរ៉េចង្កូតទៅបុកនិងរថយន្តហាយឡែនឌ័រពីក្រោយបណ្តាលអោយរងការខូចខាតហើយព្យាយាមបើករត់ត្រូវបានរថយន្តរងគ្រោះដេញឃាត់ជាប់។

ហេតុការណ៍នេះបានកើតឡើងកាលពីវេលាម៉ោង១១និង៥០នាទីយប់ ថ្ងៃអង្គារ ៩រោច ខែពិសាខ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី៨ ខែឧសភា ឆ្នាំ២០១៨ នៅចំណុចមុខវិទ្យាល័យបឹងត្របែក តាមបណ្តោយផ្លូវព្រះមុន្នីវង្ស ស្ថិតក្នុងសង្កាត់ផ្សារដើមថ្កូវ ខណ្ឌចំការមន។

បើតាមសាក្សីបានឲ្យដឹងថា មុនពេលកើតហេតុគេបានឃើញរថយន្តម៉ាកហាយឡែនឌ័រ ពណ៍ទឹកប្រាក់ ពាក់ស្លាកលេខភ្នំពេញ 2Z -7345 បើកបរដោយបុរសម្នាក់ធ្វើដំណើរតាមបណ្តោយផ្លូវព្រះមុន្នីវង្ស ក្នុងទិសដៅពីជើងទៅត្បូង ខណះមកដល់ចំណុចកើតហេតុស្រាប់តែ មានរថយន្តម៉ាកធុនត្រា ពណ៍ស ពាក់ស្លាកលេខកណ្តាល2A 9866 បើកបរដោយនារីម្នាក់ជាជនជាតិចិនធ្វើដំណើរមកពីក្រោយទាំងស្ថានភាពស្រវឹង ហើយបានជ្រុលបុកគូទរថយន្តហាយឡែនឌ័រពីក្រោយពេញទំហឹងបណ្តាលអោយរងការខូចខាត ភ្លាមនោះរថយន្តបង្កបានព្យាយាមបើករត់រហូតមកដល់ចំណុចមុខស្ថានីយ៍ប្រេងឥន្ទនះសូគីម៊ិចទើបរថយន្តរងគ្រោះដេញឃាត់បាន។

ក្រោយពេលកើតហេតុភាគីទាំងសងខាងបានធ្វើការសម្របសម្រួលដោយភាគីខាងរថយន្តបង្កចេញថ្លៃជួសជុលចំនួន១៧០០ដុល្លារដើម្បីបញ្ចប់រឿងនៅកន្លែងកើតហេតុ៕ដោយ៖ភារ៉ា ដង្កោ