ខេត្តឧត្តរមានជ័យ ៖ ករណីហឹង្សាមួយបានកើតឡើងរវាងប្តីប្រពន្ធមួយគូ ខណៈប្តីយកកាំបិតខ្វែវកាប់លើខ្លួនបន្រពន្ធជាច្រើនកាំបិតស្ទើរស្លាប់ ដោយសាររឿងប្រច័ណ្ឌ។ ករណីហឹង្សានេះ បានកើតឡើងកាលពីវេលាម៉ោង៩និង៣០នាទីព្រឹក ថ្ងៃទី២៣ ឧសភា នេះ នៅចំណុចភូមិទួលក្រឡាញ់ ឃុំថ្លាតស្រុកអន្លង់វែង ខេត្តឧត្តរមានជ័យ។
ស្ត្រីរងគ្រោះឈ្មោះ សែត ចាន់ណា អាយុ៣៦ឆ្នាំ មុខរបរលក់ដូរគ្រឿងទេស បានរងរបួសដាច់រយះកែងដៃខាងឆ្វេងមួយកាំបិត ក្បាល៣កាំបិតយ៉ាងធ្ងន់ធ្ងរ។ ចំណែកប្តីឈ្មោះ ប៊ូ ប៊ី អាយុ៤៣ឆ្នាំ ទាំង២នាក់ រស់នៅក្នុងភូមិឃុំកើតហេតុខាងលើ។
បើតាមសម្តីអ្នកភូមិក្បែរខាង បានឱ្យដឹងថា ប្តីប្រពន្ធនេះកន្លងមក តែងតែឈ្លោះប្រកែកគ្នាជាញឹកញាប់ និងធ្លាប់ប្រើអំពើហឹង្សាផងដែរ ហើយក៏ធ្លាប់លេងលះគ្នាម្តងរួចមកហើយដែរ។ ក្រោយមកបានត្រូវរ៉ូវគ្នាវិញ លុះនៅថ្ងៃកើតហេតុនេះ គេបានឮសម្លេងឈ្លោះគ្នាម្តងទៀត និងឮសម្លេងប្រពន្ធស្រែកឱ្យគេជួយ ស្រាប់តែឃើញបុរសជាប្តីកាប់ប្រពន្ធរបស់ខ្លួនដេកដួលក្នុងថ្លុកឈាមស្ទើរស្លាប់បាត់ទៅហើយភ្លាមៗអ្នកជិតខាងនាំគ្នារត់ទៅជួយទាន់ពេល។
លោកវរៈសេនីយ៍ឯក ស៊ីម វណ្ណៈ អធិការស្រុកអន្លង់វែង បានឱ្យដឹងថា ជនរងគ្រោះ បានត្រូវបញ្ជូនទៅមន្ទីរពេទ្យបង្អែកស្រុកអន្លង់វែង តែដោយសារមានសភាពធ្ងន់ធ្ងរពេក បានបន្តទៅសង្គ្រោះនៅមន្ទីរខេត្តសៀមរាបហើយ។ ដោយឡែកជនសង្ស័យជាប្តី បាននាំខ្លួនមកអធិការដ្ឋានជំនាញ ដើម្បីកសាងសំណុំរឿងចាត់ការទៅតាមនិតិវិធី៕
