ភ្នំពេញ៖ សិល្បករជើងចាស់ និងជាម្ចាស់បទ “ជីវិតក្មេងវត្ត” លោក យិន សារិន បានទទួលមរណភាពហើយនៅ រសៀលថ្ងៃទី៣១ ខែឧសភា ឆ្នាំ២០១៨នេះ ដោយសារជំងឺ នៅគេហដ្ឋានលោកម្តុំព្រែកលាប។មរណភាពលោកបានបន្សល់ទុកនូវការសោកស្តាយអាឡោះអាល័យចំពោះសិល្បករួបនេះ។
ដំណឹងដ៏ក្រៀមក្រំនៃជាបាត់បង់ធនធានមនុស្សដែលមានសមត្ថភាព និងទេពកោសល្យក្នុងវិស័យសិល្បៈ លោក យិន សារិន ធ្វើឲ្យមហាជនដែលនិយមគាំទ្របទចម្រៀងលោកមានការសោកស្តាយជាពន់ពេក រកអ្វីប្រៀបផ្ទឹមពុំបានឡើយ។ លោក យិន សារិន ជាសិល្បករម្នាក់ដែលច្រៀងបទ ក្រោមការនិព្ធរបស់សម្តេចនាយករដ្ឋមន្ត្រី ហ៊ុន សែន បានច្រើនជាងគេ។
យោងតាមកម្រងសៀវភៅដែលដឹកនាំស្រាវជ្រាវដោយ លោក ឆយ យីហ៊ាង ក្នុងចំណោមបទចម្រៀង១១៥បទដែលនិពន្ធដោយសម្តេច ហ៊ុន សែន ចន្លោះពីឆ្នាំ១៩៩០ ដល់ឆ្នាំ២០០៤ លោក យិន សារិន បានច្រៀងរហូតដល់ទៅ៥៥បទ។ លោកច្រៀងភាគច្រើនជាបទទោល ចំណែកបទឆ្លើយឆ្លងមួយចំនួន លោកច្រៀងរួមគ្នាជាមួយអ្នកស្រី ឆោម ឆវិន។ក្រៅពីបទ “ជីវិតក្មេងវត្ត” សិល្បករជើងចាស់ លោក យិន សារិន បានបន្សល់ទុកនូវបទចម្រៀងល្បីៗជាច្រើនទៀត ដូចជាបទ “ទំនួញផ្លូវលំ” “ស្ពានសាងស្នេហ៍” “សំបុកឥតមេ”ជាដើម។
លោក យិន សារិន ម្ចាស់បទ«ជីវិតក្មេងវត្ត» បានទទួលមរណភាព នៅរសៀលថ្ងៃទី៣១ ឧសភា ក្នុងអាយុ៦៨ឆ្នាំ ដោយរោគាពាធ។ សពលោក ត្រូវបានក្រុមគ្រួសារកំពុងរៀបចំតាមប្រពៃណី ដែលស្ថិតនៅគេហដ្ឋាន តាមបណ្តោយផ្លូវជាតិលេខ៦ ម្តុំសាកលវិទ្យាល័យកសិកម្មព្រែកលាភ៕ ដោយ វឌ្ឍនា
