ភ្នំពេញ ៖ បុរសម្នាក់ទំនងជាស្រវឹងស្រា បានបើករថ យន្តកាមរីហាយព្រីត ពណ៍ខ្មៅ ជ្រុលទៅបុកក្បាលនាគពុះចែកទ្រូងផ្លូវពេញទំហឹង បណ្ដាលឲ្យបាក់អស់ចំនួន2កង់ ចំណែកឯរថយន្តបង្កការខូចខាតយ៉ាងដំណំ ។
ករណីគ្រោះថ្នាក់ចរាចរណ៍នេះកើតឡើងនៅវេលាម៉ោង ០១:០០នាទីរំលងអាធ្រាត្រ ឈានចូលថ្ងៃសៅរ៍ ៤រោច ខែជេស្ឋ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី០២ ខែមិថុនា ឆ្នាំ២០១៨ ត្រង់ចំណុចស្តុបរោងកុនគីរីរម្យ ផ្លូវព្រះសីហនុ សង្កាត់បឹងព្រលិត ខណ្ឌ៧មករា រាជធានីភ្នំពេញ ។
យោងតាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុ គេឃើញរថយន្ត ស៊េរីទំនើបមួយគ្រឿងម៉ាក កាមរីហាយព្រឺក ពណ៍ខ្មៅ ពាក់ស្លាកលេខភ្នំពេញ ២Q-២៣៥៣ បើកបរដោយបុរសម្នាក់ ទំនងជាស្រវឹងស្រា រួមជាមួយនារីម្នាក់ទៀតក្នុងរថយន្ត បានធ្វើដំណើរតាមបណ្ដោយផ្លូវព្រះសីហនុ ទិសដៅពីកើតទៅលិច ក្នុងល្បឿនលឿនដូចហោះ លុះមកដល់ចំណុចកើតហេតុ ស្រាប់តែជ្រុលទៅបុករបាំងថ្មទ្រូងពុះចែកផ្លូវពេញទំហឹង បណ្ដាលបាក់និងខ្ទៀតចេញពីជួរ អស់ចំនួន២កង់ ចំណែករថយន្តបង្ក បានដាច់កាឡែកង់មុខផ្នែងខាងឆ្វេង រងការខូចខាតយ៉ាងដំណំ សំណាងល្អមិនបង្កឲ្យមនុស្សរងរបួសនោះទេ ។
ក្រោយពេលកើតហេតុភ្លាមៗ ម្ចាស់រថយន្តបង្កបានហៅរថយន្តស្ទួចរបស់ក្រុមហ៊ុនឯកជនមកស្ទួចយកទៅដោយខ្លួនឯង តែត្រូវសមត្ថកិច្ចមូលដ្ឋានចុះមកដល់កន្លែងកើតហេតុទាន់ពេល ក៏បានទាក់ទងសមត្ថកិច្ចជំនាញផ្នែកចរាចរណ៍ ចុះមកធ្វើការវាស់វែង រួចស្ទូចរថយន្តបង្កយកទៅរក្សាទុកនៅ ការិយាល័យចរាចរណ៍ជើងគោក នៃស្នងការដ្ឋាននគរបាលរាជធានីភ្នំពេញ រងចាំម្ចាស់រថយន្តចូលខ្លួនដោះស្រាយនៅពេលក្រោយ ៕ដោយ៖ ភារ៉ា ដង្កោ
