កម្មករសំណង់ម្នាក់ធ្លាក់ពីលើអគារ ជាន់ទី៤ស្លាប់យ៉ាងអាណោចអាធ័ម

ចែករំលែក៖

ភ្នំពេញ ៖ កម្មករសំណង់វ័យក្មេងម្នាក់បានធ្លាក់ពីលើសំណង់អាគារមួយកន្លែងបណ្តាលឲ្យស្លាប់ចោលប្រពន្ធកូនទាំងនៅកំព្រាវ័យក្មេង យ៉ាងអាណោចអធ័ម ។

ហេតុការណ៍នេះបានកើតឡើងកាលពីវេលាម៉ោង៥ល្ងាចថ្ងៃទីថ្ងៃទី០៥ ខែមិថុនា ឆ្នាំ២០១៨នេះស្ថិតនៅក្នុងការដ្ឋានសំណង់អាគារកំពស់៦ជាន់ ភូមិដំណាក់ត្រយឹង សង្កាត់ចោមចៅ២ ខណ្ឌពោធិ៍សែនជ័យ រាជធានីភ្នំពេញ ។

ប្រភពពីសមត្ថកិច្ចបានឲ្យដឹងថា ជនរងគ្រោះត្រូវបានស្គាល់ឈ្មោះ ចិត្ត អាយុជាង២០ឆ្នាំស្នាក់នៅកន្លែងកើតហេតុមានទីកន្លែងកំណើតនៅភូមិបាក់ព្រី ឃុំបឹងដោ ស្រុកព្រះស្ដេច ខេត្តព្រៃវែង ។

តាមប្រភពព័ត៌មានបានឲ្យដឹងថា យុវជនខាងលើត្រូវបានមេការប្រើឲ្យទៅធ្វើការនៅ លើជាន់ទី៤ ហើយជិតដល់ម៉ោងសម្រាកទៅហើយស្រាប់តែធ្លាក់ពីលើជាន់ទី៤ចំគំនរឈើ នៅខាងក្រោមបណ្ដាលឲ្យស្លាប់ភ្លាមៗតែម្ដង។

ក្រោយពេលកើតហេតុបងប្អូនជនរងគ្រោះនៅមិនអស់ចិត្តក៏ហៅរថយន្តសង្រ្គោះរបស់កងពលតូចលេខ៧០ នៃអង្គភាព៧១១ ដឹកយកសង្គ្រោះតែដោយអកុសល់ជនរងគ្រោះបានស្លាប់បាត់ទៅហើយទើបដឹកមកកន្លែងកើតហេតុវិញ។

ដោយឡែកសំណង់មួយនេះគ្មានស្លាកយីហោនោះទេ សាងសង់កៀកបំផុតទៅនឹងខ្សែកាប្លិ៍ភ្លើងដែលមានតង់ស្យ៉ុងខ្ពស់ ហើយអាជ្ញាធរភូមិដំណាក់ត្រយឹង បាននិយាយថា ម្ចាស់ការដ្ឋានសំណង់មួយនេះអាងខ្នងធំធ្វើអ្វីៗមិនដែលប្រាប់ឲ្យដឹងឡើយ។ សូម្បីតែមានកម្មករធ្លាក់ស្លាប់បែបនេះក៏ដឹកសពចេញមិនប្រាប់ឲ្យដឹងដែរ៕សុខាសែនជ័យ