ភ្នំពេញ៖ អ្នកចូលរួមខួបកំណើតនៅក្នុងក្លឹបមួយបានរត់ជាន់ជើងគ្នាដោយសារតែក្នុងកម្មវិធីនេះមានរៀបចំអុជកាំជ្រួចនិងប៉េងប៉ោងបណ្តាលឲ្យផ្ទុះប៉ះអំពូលអគ្គិសនីក្លាយជាអណ្តាតភ្លើងឆាបឆេះឡើង បង្កការភ្ញាក់ផ្អើលទាំងកណ្តាលអធ្រាត្រ ។
ការភ្ញាក់ផ្អើលនេះបានកើតឡើងកាលពីវេលាម៉ោង២និង២ ៥នាទី រំលងអធ្រាត្រឈានចូលថ្ងៃទី១៤ខែវិច្ឆិកាឆ្នាំ២០១៥ នៅតាមបណ្តោយផ្លូវលេខ៩០ស្ថិតក្នុងសង្កាត់ស្រះចកខណ្ឌដូនពេញ ។
សាក្សីបានឲ្យដឹងថា មុនកើតហេតុមានយុវជនមួយក្រុម បានជួលបន្ទប់វីអាយភីមួយធ្វើខួបកំណើតនៅក្នុងទ្រូហ្វេសក្លឹបយ៉ាងសប្បាយ ។ បន្ទាប់ពី ជួបជុំមិត្តភក្តិកម្សាន្តយ៉ាងសប្បាយ ពួកគេបាននាំគ្នាអុជកាំជ្រួចផ្កាភ្លើង និងប៉េងប៉ោងដែលបញ្ចូលខ្យល់ឲ្យហោះ ធ្វើឲ្យប៉េងប៉ោងហោះទៅប៉ះនឹងអំពូលភ្លើងពណ៌សបណ្តាលឲ្យផ្ទុះនិងចេញជាអណ្តាតភ្លើងបង្កឱ្យឲ្យឆាបឆេះផ្អើលភ្ញៀវខួបកំណើតនិងភ្ញៀវនៅក្នុងក្លឹប រត់ជាន់ជើងគ្នាពេញក្នុងក្លឹបតែម្តង ។ ភ្លាមៗនោះសន្តិសុខនិងបុគ្គលិកក្នុងក្លឹបបានតទុយោទឹកបាញ់ និងបាញ់បំពង់ពន្លត់អគ្គីភ័យធ្វើឲ្យរលត់ទៅវិញទាំងស្រុង ។
សាក្សីឲ្យដឹងទៀតថា ករណីអគ្គិភ័យនេះមិនបានឆាបឆេះពេញក្នុងក្លឹបទាំងមូលទេទេ គ្រាន់តែឆេះក្នុងបន្ទប់ដែលធ្វើពិធីខួបកំណើតប៉ុណ្ណោះ និងពុំមានមនុស្សរងរបួសដែរ ប៉ុន្តែ បានបង្កឲ្យមានការភ្ញាក់ផ្អើលដល់ក្រុមពន្លត់អគ្គិភ័យរាជធានីយករថយន្តពន្លត់អគ្គិភ័យ ២គ្រឿងទៅអន្តរាគមន៍ ហើយពេលទៅដល់ មិនបានបាញ់ទឹកទេព្រោះរលត់ទៅវិញអស់ហើយ ៕
ដោយ៖ ប្រាថ្នា
