ខេត្តកោះកុង ៖ កម្លាំងការិយាល័យប្រឆាំងគ្រឿងញៀន ដឹកនាំដោយលោកឧត្តមសេនីយ៍ត្រី មីន រស្មី ស្នងការរងទទួលផែន ប្រឆាំងបទល្មើស បានបើកប្រតិបត្តិការបង្ក្រាបករណីរក្សាទុក ជួញដូរ និងប្រើប្រាស់ថ្នាំញៀន ធ្វើឡើងនៅចំណុចភូមិ៤ សង្កាត់ ដងទង់ ក្រុងខេមរភូមិន្ទ ខេត្តកោះកុង ។ ជាលទ្ធផលកម្លាំងចាប់យកវត្ថុតាងរួមមាន ៖ ម្សៅក្រាមពណ៌សថ្លា ជាសារធាតុញៀន (ICE) ចំនួន ១២កញ្ចប់ធំ និង១ កញ្ចប់តូច (ទម្ងន់សរុប០.៦គីឡូក្រាម) និងឧបករណ៍សម្រាប់ចែកចាយ និងប្រើប្រាស់គ្រឿងញៀនចំនួនទៀត ។
លោកឧត្តមសេនីយ៍ត្រី មីន រស្មី ស្នងការរងទទួលផែនប្រឆាំងបទល្មើសបានឲ្យដឹងថា ប្រតិបត្តិការខាងលើធ្វើឡើងកាលពីថ្ងៃទី១៣ ខែមិថុនា ឆ្នាំ២០១៨ វេលាម៉ោង ១០និង៣០នាទី ។
លោកអោយដឹងទៀតថា ក្នុងនោះកម្លាំងសមត្ថកិច្ចបានឃាត់ខ្លួនជនសង្ស័យ២ នាក់ ទី១-ឈ្មោះ ឃុន សិលា ហៅឌុលឡា ភេទប្រុស អាយុ៣៣ឆ្នាំ មានទីលំនៅភូមិ៤ សង្កាត់ដងទង់ ក្រុងខេមរភូមិន្ទ, ទី២-ឈ្មោះ សើ រ៉ហ៊ីម ហៅម៉ាប់ អាយុ១៩ ឆ្នាំ មានទីលំនៅភូមិ៤ សង្កាត់ដងទង់ ក្រុងខេមរភូមិន្ទ។
លោកបន្តថា វត្ថុតាងដកហូតរួមមានៈ ម្សៅក្រាមពណ៌សថ្លាសង្ស័យជាសារធាតុញៀន (ICE) ចំនួន ១២កញ្ចប់ធំ និង១ កញ្ចប់តូច (ទម្ងន់សរុប០.៦គីឡូក្រាម) និងឧបករណ៍សម្រាប់ចែកចាយ និងប្រើប្រាស់គ្រឿងញៀនចំនួនទៀត។ ចំណែកជនសង្ស័យទាំង២នាក់ និងវត្ថុតាង ត្រូវបានសមត្ថកិច្ចកសាងសំណុំរឿង ដើម្បីបញ្ជូនទៅកាន់សាលាដំបូងខេត្តកោះកុង ដើម្បីផ្តន្ទាទោសតាមច្បាប់ ៕ នគរដ្រេហ្គន