ភ្នំពេញ: នារីម្នាក់ដើរចេញពីធ្វើការបំណងទៅផ្ទះមិត្តភក្តិ ត្រូវបានក្រុមចោរធ្វើសកម្មភាពឆក់កាបូបស្ពាយបានសម្រេច រួចជិះរត់គេចខ្លួនបាត់ស្រមោល។ ហេតុការណ៍នេះកើតឡើងកាលពីម៉ោងជាង២រំលងអធ្រាត្រឈានចូលថ្ងៃទី២៩ ខែមិថុនា ឆ្នាំ២០១៨ នៅតាមបណ្តោយផ្លូវ១០B ខាងក្រោយខារ៉ាអូខេញ៉ូស្តារ ស្ថិតក្នុងសង្កាត់ទឹកថ្លា ខណ្ឌសែនសុខ។
សមត្ថកិច្ចបានឲ្យដឹងថាជនរងគ្រោះមានឈ្មោះ ចេង ចិន្តា អាយុ២១ឆ្នាំ ជាបុគ្គលិកបំរើការនៅខារ៉ាអូខេ ញ៉ូស្តារ ស្នាក់នៅសង្កាត់ផ្សារដើមគ ខណ្ឌទួលគោក មានស្រុកកំណើរនៅខេត្តសៀមរាប។
បើតាមសម្តីពីជនរងគ្រោះបានឲ្យដឹងថា នៅមុនពេលកើតហេតុខ្លួនបានធ្វើដំណើរថ្មើរជើងតែម្នាក់ឯង តាមបណ្តោយផ្លូវ10B ក្នុងទិសដៅពីកើតទៅលិច ដែលទើបតែចេញមកពីកន្លែងធ្វើការបំណងដើរទៅផ្ទះរបស់មិត្តភក្តីដែលនៅក្បែរកន្លែងកើតហេតុ។ ខណៈមកដល់ចំណុចកើតហេតុស្រាប់តែមានក្រុមជនសង្ស័យ២នាក់បើកម៉ូតូមួយគ្រឿងម៉ាក ហុងដាឌ្រីម ពណ៌ខ្មៅ មិនចាំស្លាកលេខ មកពីក្រោយ រួចក៏បានធ្វើសកម្មភាពឆក់កាបូបស្ពាយពីរខ្លួន ដែលស្ពាយនៅនិងស្មារបានសម្រេចបណ្តាលឲ្យដួលរងរបួសរលាត់ដៃរលាត់ជើង ភ្លាមៗនេះក្រុមចោរបានបន្ថែមល្បឿនជិះរត់គេចខ្លួនបាត់ស្រមោលដោយសុវត្ថិភាព ហើយរបស់របរដែលនៅក្នុងកាបូបដែលត្រូវក្រុមចោរធ្វើសកម្មភាពឆក់យកទៅនេះ មានលុយចំនួន២៥០ដុល្លារ និងរបស់របរមួយចំនួនទៀត។
បន្ទាប់ពីកើតហេតុជនរងគ្រោះត្រូវបានមិត្តភក្តិដឹកតាមម៉ូតូកង់បីទៅផ្ទះ រង់ចាំព្រឹកស្អែកបានទៅដាក់ពាក្យបណ្តឹងនៅប៉ុស្តិ៍នគរបាលទឹកថ្លសជាក្រោយ៕ជ្រោយពេជ្រ
