ភ្នំពេញ៖ ហេតុការណ៍ដ៏គួរភ្ញាក់ផ្អើលមួយ បានធ្វើឲ្យមនុស្សម្នា និងសមត្ថកិច្ចហួសចិត្តគ្រប់គ្នា ខណៈដែលយុវជន២នាក់បាននាំគ្នាជិះម៉ូតូចេញពីក្លិប ក្នុងបំណងត្រឡប់ទៅផ្ទះវិញ តែក៏រេចង្កូតធ្លាក់ចូលទឹកប្រឡាយទាំងមនុស្សទាំងម៉ូតូ ប៉ុន្តែក្រោយពេលដែលពួកគេរាវស្រង់ម៉ូតូឡើងមកវិញ ក៏ស្រាប់តែប៉ះម៉ូតូមួយគ្រឿងទៀត ក៏ឆោឡោបង្កឲ្យមានការភ្ញាក់ផ្អើលនៅវេលាម៉ោង១យប់ រំលងអធ្រាត្រ ឈានចូលថ្ងៃទី១៨ ខែវិច្ឆិកា ឆ្នាំ២០១៥ នៅចំណុចស្ពានដែកទួលពង្រ ស្ថិតក្នុងភូមិសំបួរ សង្កាត់ដង្កោ ខណ្ឌដង្កោ ។
យុវជនទាំង២នាក់ ១.ឈ្មោះម៉េង មឿន ភេទប្រុស អាយុ២៣ឆ្នាំ មុខរបរព្រូរថយន្តក្រុងស្នាក់នៅក្នុងការ៉ាសឡាន ក្នុងភូមិទូលពង្រ សង្កាត់ចោមចៅ ខណ្ឌពោធិ៍សែនជ័យ និង២.ឈ្មោះផល យ៉ាត ភេទប្រុស អាយុ២៣ឆ្នាំ ធ្វើការនិងស្នាក់នៅជាមួយគ្នា ទាំង២នាក់ជិះម៉ូតូសង់កូរ៉េ ពណ៌ក្រហម ពាក់ស្លាកលេខ កំពង់ធំ 1C-2759 ។
តាមសម្ដីរៀបរាប់របស់យុវជនទាំង២នាក់បានឲ្យដឹងថា មុនពេលកើតហេតុពួកគេទាំង២នាក់ចេញពីក្លិប គោលបំណងត្រលប់ទៅដេកនៅកន្លែងធ្វើការវិញ ដោយបានជិះម៉ូតូសង់កូរ៉េ១គ្រឿង ធ្វើដំនើរតាមផ្លូវ បេតុងទួលពង្រទិសដៅពីកើតទៅលិច ។ លុះដល់ចំនុចកើតហេតុដោយសារតែផ្លូវងងឹត ហើយអ្នកបើកបរស្រវឹងផងនោះ ក៏បានរេចង្កូតធ្លាក់ពីលើស្ពានដែលអត់មានបង្កាន់ដៃ ចូលទៅក្នុងទឹកស្អុយទាំងមនុស្សនិងម៉ូតូតែមិនបណ្តាលឲ្យរងរបួសទេ។ ភ្លាមៗនោះជនរងគ្រោះម្នាក់បានលឹបទឹករុករកម៉ូតូ ស្រាប់តែរាវបានម៉ូតូ១គ្រឿងនាំគ្នាចងអូសមកដល់លើគោក ដោយសារតែងងឹតមើលអត់ដឹងទេ ទាល់តែលើកមកដល់លើគោកទើបដឹងថា ជាម៉ូតូម៉ាកMSX ពណ៌ស អត់ស្លាកលេខ ដែលមិនមែនជាម៉ូតូរបស់គេទៅវិញ ធ្វើឲ្យជនរងគ្រោះភ័យស្លន់ស្លោស្មានតែខ្មោចលង ក៏ស្រែកហៅឲ្យអ្នកនៅក្បែរនោះ និងអ្នកដំណើរមកជួយមើលនិងរាយការណ៍ទៅសមត្ថកិច្ចមូលដ្ធានចុះទៅដល់កន្លែងកើតហេតុ ក៏មានការឆ្ងល់ដោយនឹកថាបុរសទាំង២នាក់កុហក ប៉ុន្តែជនរងគ្រោះបានទូរស័ព្ទប្រាប់បងប្អូនឲ្យមកជួយ ដល់ពេលបងប្អូនមកដល់ ជនរងគ្រោះបានចុះរាវរកម្តងទៀតក៏ប៉ះត្រូវម៉ូតូសង់កូរ៉េរបស់គេវិញក៏នាំគ្នាស្រង់មកដាក់លើគោកតែម្ដង ។
ក្រោយពេលកើតហេតុម៉ូតូទាំង២គ្រឿងនិងយុវជនរងគ្រោះ ត្រូវបានសមត្ថកិច្ចនាំយកទៅសាកសួរបំភ្លឺនៅប៉ុស្តិ៍នគរបាលដង្កោ ដើម្បីយកឯកសារមកបញ្ជាក់ទើបប្រគល់ម៉ូតូឲ្យត្រលប់ទៅផ្ទះវិញ។ ចំណែកកម៉ូតូ១គ្រឿងទៀតដែលរកឃើញនៅក្នុងប្រឡាយទឹកនោះ ត្រូវសមត្ថកិច្ចរក្សាទុកនៅប៉ុស្តិ៍នគរបាលដង្កោ ដើម្បីស្រាវជ្រាវបន្តទៀត ៕
ដោយ៖ វិបុល
