ភ្នំពេញ៖ មានការភ្ញាក់ផ្អើលពេញបណ្តាញសង្គមហ្វេសប៊ុក ពិសេសក្នុងចង្កោមអ្នកសិល្បៈក្រោយពីតារាសម្តែងស្រីអារីយ៉ា ដានី បានបង្ហោះរូបថតជាច្រើនសន្លឹកជាមួយនឹងការបង្ហាញភាពសោកស្តាយអមដោយរូបភាពតារាសម្តែងស្រី សឿន ផានផាភួង។ តាមការពិតគឺគ្រាន់តែជាឈុតឆាកនៃការសម្តែងក្នុងភាពយន្តែប៉ុណ្ណោះ។
ទោះជាយ៉ាងណាដើមឡើយបានធ្វើឲ្យមិត្តភ័ក្កិរួមអាជីព អ្នគាំទ្រ និងសាច់ញាតិនាងរន្ធត់ចិត្តមិនតិចទេ។ សូម្បីតែក្មួយស្រីនាងគឺអាង សុជាតា ហៅ ឈូឈូ យំបោកខ្លួនក្រោយឃើញគេបង្ហោះរូបតារាសម្ដែង សឿន ផានផាភួង ត្រូវបានស្លាប់។ អ្នករួមអាជីពមួយ សឿន ផានផាភួង បានជជីកសួរដេញដោលគ្នាថា ជាការពិតមែនទេ ដែលតារាសម្ដែងរូបនេះស្លាប់។ក្រោយពីជជែកសួរដេញដោលរួចមក ទើបទទួលបានពីអ្នកសិល្បៈដែលកំពុងតែថតរឿង ជាមួយ សឿន ផានផាភួង ថានេះគឺជាឈុតឆាកមួយដែលស្រីស្អាតរូបនេះសម្ដែងក្នុងរឿង”សម្ពាយបុណ្យ”របស់ទូរទស្សន៍បាយ័នតែប៉ុណ្ណោះ គឺនាងមិនបានស្លាប់ទេ។
តារាសម្តែង សឿន សានផាភួង វិញបានបកស្រាយថានាងមិនមានអ្វីកើតឡើងទេសូម្បីតែបញ្ហាសុខភាព។ នាងថា រូបភាពដែលស្លាប់គឺពួកម៉ាក នាង យកទៅបង្ហោះតែមិនបានសរសេររៀបរាប់ឲ្យអស់អត្ថន័យថាជាឈុតឆាកថតរឿង ទើបធ្វើឲ្យមានការស្លន់ស្លោភ័យបែបនេះ។ នាងបានថ្លែងសុំទោសចំពោះការបង្ហោះរូបថតទាំងនេះដែលបង្កឲ្យមានការភ្ញាក់ផ្អើលបែបនេះ៕ ដោយ វឌ្ឍនា
