ភ្នំពេញ៖ បុរសម្នាក់បើករថយន្តកូរ៉េបត់ឆ្លងផ្លូវ ហើយបួងចង្កូតមិនទាន់បានជ្រុលទៅបុកនឹងក្បាលនាគពុះចែកទ្រូងផ្លូវពេញទំហឹង បណ្តាលអោយរថយន្តរងការខូចខាតផ្នែកខាងមុខយ៉ាងដំណំ ។
កាលពីវេលាម៉ោង៩នឹង២០នាទីយប់ថ្ងៃទី១៩ ខែវិច្ឆិកា ឆ្នាំ២០១៥ នៅចំណុចមុខខារ៉ាអូខេវីនីស តាមបណ្តោយផ្លូវព្រះមុន្នីរ៉េត(217) ស្ថិតក្នុងសង្កាត់ទួលស្វាយព្រៃទី២ ខណ្ឌចំការមន ។
សមត្ថកិច្ចបានអោយដឹងថា នៅមុនពេលកើតហេតុមានរថយន្តកូរ៉េមួយគ្រេឿងបើកបរដោយបុរសម្នាក់ តាមបណ្តោយផ្លូវលេខ៣២៨ ទិសដៅពីកើតទៅលិច ពេលមកដល់ចំណុចកើតហេតុក៏បានបត់ឆ្វេងឡើងទៅផ្លូវព្រះមុន្នីរ៉េត តែដោយសារបួងចង្កូតមិនទាន់បានជ្រុលបុកក្បាលនាគពុះចែកទ្រូងផ្លូវពេញទំហឹង បណ្តាលអោយរថយន្តរងការខូចខាតផ្នែកខាងមុខយ៉ាងដំណំ រីឯក្បាលនាគគ្រាន់តែវៀចប៉ុណ្ណោះ ហើយក៏សំណាងល្អដែរ ដែលមិនបង្កគ្រោះថ្នាក់ដល់អ្នកដំណើរណាម្នាក់នោះទេ ។
សមត្ថកិច្ចបានបញ្ជាក់ថា រថយន្តបង្កកម្លាំងជំនាញបានចុះមកធ្វើការវាស់វែង និងស្ទូចយកទៅរក្សាទុកនៅការិយាល័យចរាចរណ៍ជើងគោក នៃស្នងការដ្ឋានរាជធានីភ្នំពេញ រង់ចាំដោះស្រាយទៅតាមផ្លូវច្បាប់ ៕
ដោយ៖ ភារ៉ា ដង្កោ
