ភ្នំពេញ៖ បុរសវ័យចំណាស់ម្នាក់ បានបើករថយន្ត Highlander មួយគ្រឿងយ៉ាងលឿន បើកវ៉ាជែងម៉ូតូក៏ជ្រុលចង្កូតទៅបុករថយន្ត ២គ្រឿង និងបន្តទៅបុកជាមួយម៉ូតូ ២គ្រឿងទៀត បណ្តាលឲ្យបុរសម្នាក់ស្លាប់ និងម្នាក់ទៀតរបួសធ្ងន់។
ហេតុការណ៍គ្រោះថ្នាក់ចរាចរណ៍ខាងលើនេះបានកើតឡើងកាលពីម៉ោងជាង ១១ ថ្ងៃទី១១ ខែសីហា ឆ្នាំ២០១៨ ស្ថិតនៅតាមបណ្តោយផ្លូវជាតិលេខ៦ សង្កាត់ព្រែកលៀប ខណ្ឌជ្រោយចង្វារ រាជធានីភ្នំពេញ។
ជនរងគ្រោះមានឈ្មោះ ង្វៀង យ៉ាងម៉េវ អាយុ ២៣ឆ្នាំ មុខរបរ ជាងឈើ (ស្លាប់បាត់បង់ជីវិត) ស្នាក់នៅភូមិថ្មី ស្រុកពញាឮ ខេត្តកណ្តាល និងម្នាក់ទៀតមានឈ្មោះ សុខខន សុខទី អាយុ ២២ឆ្នាំស្នាក់នៅផ្ទះ82ដេ ផ្លូវជាតិលេខ៦ សង្កាត់ព្រែកលៀប ខណ្ឌជ្រោយចង្វារ រាជធានីភ្នំពេញ ចំណែកឯម្ចាស់រថយន្តបង្កមិនត្រូវបានស្គាល់អត្តសញ្ញានោះឡើយ។
ប្រភពពត៌មាននៅកន្លែងកើតហេតុ បានឲ្យដឹងថា មុនពេលកើតហេតុ រូបគាត់បានចំលងក្មេងៗចេញពីសាលារៀន ខណៈនោះ ស្រាប់តែឃើញមានរថយន្ត មួយគ្រឿង ម៉ាក Toyota Highlander ពណ៌ទឹកប្រាក់ ពាក់ស្លាកលេខ ភ្នំពេញ 2AJ-3708 បើកបរក្នុងទិសដៅពីត្បូងទៅជើង បានបើកវ៉ាជែងម៉ូតូ មួយគ្រឿងមិនចាំម៉ាក ដោយធ្វើដំណើរស្របទិសគ្នា ហើយក៏ជ្រុលចង្កូតមកបុករះរថយន្ត ២គ្រឿង ហើយបន្តមកបុករះម៉ូតូ ២គ្រឿងទៀតដែលម្ចាស់ជិះយកមកដាក់ធ្វើ រួចបានបុកម្ចាស់ម៉ូតូម្នាក់ស្លាប់ពេលបញ្ជូនទៅដល់មន្ទីរពេទ្យកាល់ម៉ែត្រ រឺឯម្នាក់ទៀតបានរងរបួសធ្ងន់។
បន្ទាប់ពីកើតហេតុ សមត្ថកិច្ចមូលដ្ឋានបានចុះមកដល់កន្លែងកើតហេតុ និងបានទាក់ទងទៅសមត្ថកិច្ចជំនាញផ្នែកចរាចរជើងគោក នៃស្នងការនគរបាលរាជធានីភ្នំពេញ ដើម្បីរង់ចាំធ្វើការដោះស្រាយគ្នាតាមនិតីវិធីច្បាប់៕ជ្រោយពេជ្រ
