ខេត្តព្រះវិហារ ៖ យ៉ាងតិចមានមនុស្ស៤នាក់បានស្លាប់ និងរបួសធ្ងន់ ក្នុងហេតុការណ៍គ្រោះថ្នាក់ចរាចរណ៍ រវាងគោយន្តកែច្នៃ បុកគ្នាជាមួយរថយន្តសាំយុង នាល្ងាចថ្ងៃទី១៥ ខែសីហា ឆ្នាំ២០១៨នេះ នៅលើកំណាត់ផ្លូវជាតិលេខ៦២ ត្រង់ចំណុចផ្លូវកោងហួសមណ្ឌលសុខភាពតាកឹង ចម្ងាយ២៥០ម៉ែត្រ ក្នុងភូមិសាស្ត្រភូមិថ្នល់បែក ឃុំថ្មី ស្រុកគូលែន ខេត្តព្រះវិហារ ។ នេះបើតាមការបញ្ជាក់ពីតួលេខបន្ថែមពីសមត្ថកិច្ច ។
តាមប្រភពព័ត៌មានពីសមត្ថកិច្ចបានឲ្យដឹងថា ជនរងគ្រោះទាំងបីនាក់មានឈ្មោះសុង សីង ភេទប្រុស អាយុ៤៧ឆ្នាំ ជនជាតិខ្មែរ មុខរបរកសិករ (ស្លាប់) អ្នកបើកបររថយន្តសាំយុង និងអ្នករួមដំណើរចំនួន០៣នាក់ ស្រីចំនួន០២នាក់ ស្លាប់ម្នាក់ ភេទស្រី និងរបួសធ្ងន់០២នាក់ ព័ត៌មានបឋមអះអាងថាបានស្លាប់ហើយ ។
សមត្ថកិច្ចបញ្ជាក់បន្ថែមថា អ្នកបើកបររថយន្តគោយន្តកែច្នៃឈ្មោះសិប ធី ភេទប្រុស អាយុ៤០ឆ្នាំ ជនជាតិខ្មែរ មុខរបររត់តាក់ស៊ី មានស្រុកកំណើតភូមិត្រពាំង ឃុំឈើទាល ស្រុកជុំគិរី ខេត្តកំពត ។ បច្ចុប្បន្នរស់នៅភូមិឃុំ ស្រុកអន្លង់វែង ខេត្តឧត្តមានជ័យ រងរបួសធ្ងន់ ៕ វណ្ណៈ
