ខេត្តកណ្តាល៖ មុខសញ្ញាប្រើប្រាស់គ្រឿងញៀន៣នាក់ត្រូវបានសមត្ថកិច្ចនគរបាលស្រុកពញាឮឃាត់ខ្លួនជាក់ស្តែងពេលកំពុងសំងំប្រើប្រាស់គ្រឿងញៀន នៅលើផ្ទះមួយកន្លែងគ្មានមនុស្សរស់នៅស្ថិតក្នុងភូមិថ្នល់បត់ ឃុំកោះចិន ស្រុកពញាឮ ។
កាលពីវេលាម៉ោង១៨ និង៣០នាទី ថ្ងៃទី២៣ ខែវិច្ឆិកា ឆ្នាំ២០១៥ ដកហូតបានថ្នាំញៀនប្រភេទមេតំហ្វេតាមីន០១កញ្ចប់ និងសម្ភារៈប្រើប្រាស់គ្រឿងញៀនមួយចំនួនទៀត ដើម្បីកសាងសំណុំរឿងចាត់ការតាមច្បាប់ ។
អធិការនគរបាលស្រុកពញាឮលោកវរសេនីយ៍ទោ ដួង តេង បានឲ្យដឹងថា ជនសង្ស័យ ទី១-ឈ្មោះ ហ៊ុន ម៉េងគាន់ ភេទប្រុស អាយុ១៧ឆ្នាំ ជនជាតិខ្មែរ មុខរបរ ជាកម្មករសំណង់ ទី២-ឈ្មោះ ព្រំ សុរ៉ានី ភេទប្រុស អាយុ២១ឆ្នាំ ជនជាតិខ្មែរ មុខរបរ ជាកម្មករ និងទី៣-ឈ្មោះ រ៉ាន់ អូន ភេទស្រី អាយុ១៧ឆ្នាំ ជនជាតិខ្មែរ មុខរបរ ជាអ្នកលក់-ដូរ ។ ជនសង្ស័យប្រុស-ស្រីទាំង៣នាក់ខាងលើនេះមានទីលំនៅក្នុងភូមិថ្នល់បត់ ឃុំកោះចិន ស្រុកពញាឮ ។
លោកវរសេនីយ៍ទោ ដួង តេង បានបន្តថា នៅមុនពេលបើកប្រតិបត្តិការខាងលើនេះកម្លាំងនគរបាលស្រុក បានទទួលព័ត៌មានពីប្រជាពលរដ្ឋនៅក្នុងភូមិថ្នល់បត់ថាឧស្សាហ៏មានក្មេងស្ទាវឡើងទៅលើផ្ទះមួយកន្លែងគ្មានមនុស្សរស់នៅ ដើម្បីសំងំប្រើប្រាស់គ្រឿងញៀន ។ បន្ទាប់ពីទទួលបានព័ត៌មានរួចមក លោកបានបញ្ជាឲ្យកម្លាំងនគរបាលស្រុកចុះឃ្លាំមើលលំនៅដ្ឋានខាងលើនេះ ខណៈនោះក៏បានប្រទះឃើញជនសង្ស័យប្រុស-ស្រី៣នាក់ខាងលើនេះឡើងទៅលើផ្ទះមួយនោះ ទើបកម្លាំងនគរបាលឡោមព័ទ្ធឡើងចាប់ខ្លួនក្រុមជនសង្ស័យរួមជាមួយវត្ថុតាងជាក់ស្តែង បញ្ជូនទៅកាន់អធិការដ្ឋាននគរបាលស្រុក ដើម្បីកសាងសំណុំរឿងចាត់ការតាមច្បាប់ ៕
ដោយ៖ ស្អាងជ័យ
