ខេត្តកំពង់ឆ្នាំង៖ បទល្មើសនេសាទជាច្រើនកន្លែងទៀតនៅក្នុងភូមិសាស្ត្រស្រុកបរិបូរណ៍ ខេត្តកំពង់ឆ្នាំង ត្រូវបានកម្លាំងនគរបាលប្រឆាំងបទល្មើសសេដ្ឋកិច្ចក្រសួងមហាផ្ទៃ និង កម្លាំងនគរបាលខេត្តកំពង់ឆ្នាំង បានរកឃើញ ហើយបានរុះរើបំផ្លាញចោល ។ ប្រតិបត្តិការចុះរកបទល្មើសនេសាទគឺបានធ្វើជាច្រើនថ្ងៃជាប់គ្នា ។
មន្ត្រីនគរបាលក្រសួងមហាផ្ទៃដែលបានចូលរួមក្នុងប្រតិបត្តិការនេះសបានប្រាប់ថា ចំណុចដែលក្រុមការងារចុះរកឃើញមានបទល្មើសនេសាទនោះមានចំណុច កោះតាម៉ូវ កំពង់អួ សេះស្លាប់ ជ្រោយស្លែង ដែលស្ថិតនៅក្នុងស្រុកបរិបូរណ៍ ខេត្តកំពង់ឆ្នាំង ។ ក្នុងប្រតិបត្តិការណ៍នេះគឺកម្លាំងប៉ូលីសរបស់ក្រសួងមហាផ្ទៃបានកាប់បំផ្លាញចោលនូវរបាំងសាច់អួនប្រវែង១៥០០ម៉ែត្រលបលូ៦គ្រឿង និង បង្គោលជាច្រើនដើមទៀត ។ ការបង្ក្រាបបទល្មើសនេសាទនេះគឺក្រោយពីកម្លាំង បានចុះធ្វើការស្រាវជ្រាវរកទីតាំងច្បាស់លាស់ និង បានចេញប្រតិបត្តិការតែម្តង ។
តាមប្រភពបានអោយដឹងថា រាល់បទល្មើសនេសាទទាំងនេះគឺគ្រប់សមត្ថកិច្ចទាំងអស់សុទ្ធតែបានទទួលលាភសក្ការៈពីឈ្មួញនេសាទខុសច្បាប់ទាំងនេះ ទៅតាមទំហំនៃបទល្មើស ដែលលាភសក្ការៈទាំងនេះ គឺមានតាំងពីមូលរហូតដល់ខេត្ត ទាំងអាជ្ញាធរ ទាំងសមត្ថកិច្ច ។
លោកសោម ភិរុណ នាយខ័ណ្ឌរដ្ឋបាលជលផលកំពង់ឆ្នាំង បានប្រាប់តាមទូរស័ព្ទថា ធម្មតាបទល្មើស នេសាទនៅក្នុងភូមិសាស្ត្រខេត្តកំពង់ឆ្នាំងគឺនៅតែមានចៀសមិនផុត ព្រោះអ្នកខិលខូចនៅតែលបលួចដាក់ តែដោយសារកម្លាំងជលផលមានមិនគ្រប់ ដូចនេះការបង្ក្រាបធ្វើនៅមានកម្រិត មិនសព្វនោះទេ ។
ចំពោះការចុះបង្ក្រាបរបស់ប៉ូលីសក្រសួងមហាផ្ទៃ លោកនាយខ័ណ្ឌបញ្ជាក់ថា សូមគាំទ្រ ប៉ុន្តែដើម្បីអោយកិច្ចការបង្ក្រាបនេះកាន់តែមានប្រសិទ្ធភាព ប្រកបដោយគុណតម្លៃនោះ គ្រប់កម្លាំង សមត្ថកិច្ចទាំងអស់គួរតែសហការជាមួយជំនាញជលផល ប្រើកម្លាំងសរុប វិធានការសរុបដើម្បីរកជនខិលខូចអ្នកប្រព្រឹត្តបទល្មើសនេសាទពិតប្រាកដ ចៀសវាងការសាចទឹកដាក់គ្នារវាងសមត្ថកិច្ចនិង សមត្ថកិច្ច រឿងផលប្រយោជន៍ ៕
ដោយ៖ ចន្ថា
