ខេត្តកំពង់ឆ្នាំង ៖ កុមារាតូចម្នាក់ អាយុ ទើបតែ ២ឆ្នាំ ខណៈដើរតាមក្រោយឪពុក តែឪពុកមិនបានចាប់អារម្មណ៍ដើរទៅបាត់ ធ្វើឲ្យកុមាររូបនេះធ្លាក់ទឹកស្រះ បណ្តាលឲ្យស្លាប់យ៉ាងអាណោចអាធ័ម កាលពីវេលាម៉ោង ១១និង១០ នាទីព្រឹក ថ្ងៃ ព្រហស្បតិ៍ ៣ រោច ខែ ភទ្របទ ឆ្នាំ ច សំរឹទ្ធិស័ក ព.ស.២៥៦២ ត្រូវនឹង ថ្ងៃទី២៧ ខែកញ្ញា ឆ្នាំ២០១៨ នៅភូមិចំពារ ឃុំព្រៃគ្រី ស្រុកជលគិរី ខេត្តកំពង់ឆ្នាំង។
សមត្ថកិច្ចនគរបាលស្រុកជលគិរីបានឲ្យដឹងថា កុមារារងគ្រោះ មានឈ្មោះ ចិត ដារ៉ា ភេទប្រុស អាយុ ២ឆ្នាំ មានឪពុកឈ្មោះ កៅ ចិត អាយុ ២៥ឆ្នាំ ម្តាយឈ្មោះ ថេន ចន្ទ័ធឿន អាយុ ២៧ឆ្នាំ រស់នៅក្នុង ភូមិឃុំស្រុក កើតហេតុ ខាងលើ ។ មុនពេលកើតហេតុ ឪពុករបស់កុមាររងគ្រោះ បានចេញពីផ្ទះ ទៅធ្វើបន្ទប់ទឹកឲ្យគេនៅក្នុងភូមិ ហើយមិនបានដឹងថា កូនប្រុសតូចដើរតាមក្រោយនោះទេ។
ច្រើនម៉ោងក្រោយមកដោយបាត់ មិនឃើញកូននៅក្នុងផ្ទះ ក៍នាំគ្នាផ្អើលឆោឡោ ដើររក ភ្លាមៗនោះ ក៍នាំគ្នាចុះរាវ ក្នុងស្រះ ក៍បានប្រទះឃើញ កុមារាដែលជាកូន លង់ទឹកស្លាប់ បាត់ទៅហើយ ធ្វើឲ្យឪពុកម្តាយយំ សោកសង្រេងក្រៃលែង ខណៈម្តាយស្មានថាកូនទៅជាមួយឪពុក ឯឪពុកស្មានថានៅផ្ទះជាមួយម្តាយ ។
ក្រោយពេលកើតហេតុ សាកសពកុមាររងគ្រោះ ត្រូវបានឪពុកម្តាយ នាំយកទៅធ្វើបុណ្យ ទៅតាមប្រពៃណីផងដែរ៕
