ភ្នំពេញ៖ ហេតុការណ៍ដ៏គួរឲ្យរន្ធត់មួយបានកើតឡើងបណ្ដាលឲ្យយុវជនម្នាក់បានបោកក្បាលស្លាប់ភ្លាមៗនៅនឹងកន្លែង ហើយមនុស្សស្រី២នាក់ទៀតរងរបួសធ្ងន់ ដោយសារតែត្រូវរថយន្តស៊េរីទំនើបមួយគ្រឿងបើកក្នុងល្បឿនយ៉ាងលឿនបានវ៉ារថយន្ត២គ្រឿងទៀតមិនផុត ក៏បានជ្រុលចង្កូតទៅបុកម៉ូតូមួយគ្រោះងដែលជិះបញ្រ្ចាសទិសគ្នាពេញទំហឹង ប៉ើងអូសប្រហែល១៥ម៉ែត្រ ។

ហេតុការណ៍គ្រោះថ្នាក់ចរាចរណ៍ខាងលើនេះបានបង្កការភ្ញាក់ផ្អើលដល់ប្រជាពលរដ្ឋដែលធ្វើដំណើរតាមផ្លូវឈប់មើលឡើងព្រមព្រៀត កាលពីវេលាម៉ោង៩ និង៤៥នាទីយប់ថ្ងៃទី២៦ ខែវិច្ឆិកា ឆ្នាំ២០១៥នៅចំណុចមុខផ្ទះសំណាក់.កេសីវល្ខ័ក តាមបណ្តោយផ្លូវលេខ៣៧១ ស្ថិតក្នុងភូមិត្នោតជ្រុំ៣ សង្កាត់បឹងទំពន់ ខណ្ឌមានជ័យ ។

បើតាមសម្ដីពីសមត្ថកិច្ចបានប្រាប់អោយដឹងថា ជនរងគ្រោះដែលស្លាប់មានឈ្មោះ ភិន រ៉ា ភេទប្រុស អាយុ១៨ឆ្នាំ បច្ចុប្បន្នស្នាក់នៅសង្កាត់បឹងត្របែក ខណ្ឌចំការមន រីឯជនរងគ្រោះរបួសធ្ងន់នោះមិនទាន់ស្គាល់អត្តសញ្ញាណនៅឡើយទេ ។ ចំណែកជនបង្កមានឈ្មោះ ឈិត ដារ៉េត ភេទប្រុស អាយុ២៦ឆ្នាំ មានមុខរបរជាអ្នកបើករថយន្តអោយក្រុមហ៊ុនដេលី មានស្រុកកំណើតក្នុងភូមិបឹងជន្លេន ឃុំឬស្សីជ្រោយ ស្រុកមុខកំពូល ខេត្តកណ្តាល ។

បើតាមសាក្សីដែលឃើញហេតុការណ៍នេះបានប្រាប់ឲ្យដឹងថា មុនពេលកើតហេតុគេបានឃើញរថយន្តស៊េរីទំនើបមួយគ្រឿង ម៉ាក FORTUNER ពណ៍ទឹកប្រាក់ ពាក់ស្លាកលេខភ្នំពេញ2Z-6740 បើកបរដោយបុរសម្នាក់ ក្នុងល្បឿនយ៉ាងលឿនទិសដៅពីកើតទៅលិច ហើយបានវ៉ារថយន្ត២គ្រឿងទៀតដែលនៅខាងឆ្វេងដៃ ក៏បានបុកម៉ូតូហុងដាឌ្រីមសេ១១០ ពណ៍ខ្មៅ ពាក់ស្លាកលេខភ្នំពេញ1BA-8700 ជិះដោយមនុស្សប្រុសស្រី៣នាក់ដែលជិះបញ្ច្រាសទិសគ្នា ស្រាប់តែរថយន្តមកបុកពេញទំហឹង ប៉ើងខ្ទៀតប្រហែលជាង១៥ម៉ែត្រ បណ្តាលអោយយុវជនម្នាក់បោកក្បាលស្លាប់ភ្លាមៗនៅនឹងកន្លែងកើតហេតុ និងនារី២នាក់ទៀតរងរបួសធ្ងន់បាក់ដៃបាក់ជើង ត្រូវរថយន្តដឹកយកទៅសង្គ្រោះនៅមន្ទីរពេទ្យភ្លាមៗ ចំណែកម៉ូតូរងការខូចខាតយ៉ាងដំណំ និងរថយន្តដាច់កាឡេកង់មុខខាងឆ្វេងទៅមុខលែងរួច ។

ក្រោយពេលកើតហេតុសមត្ថកិច្ចមូលដ្ឋាន និងជំនាញបានចុះមកធ្វើការវាស់វែងដោយយកម៉ូតូ និងរថយន្តរួមទាំងជនបង្កហេតុទៅការិយាល័យចរាចរណ៍ជើងគោករាជធានីភ្នំពេញ រង់ចាំដោះស្រាយទៅតាមផ្លូវច្បាប់ ចំណែកសពយុវជនសមត្ថកិច្ចបានទំនាក់ទំនងទៅក្រុមគ្រួសារអោយមកទទួលយកទៅធ្វើបុណ្យតាមប្រពៃណី ៕

ដោយ៖ ភារ៉ា ដង្កោ