ភ្នំពេញ៖ ប្រជាការពារម្នាក់ រងការបាញ់ប្រហារជាច្រើនគ្រាប់ពីបុរសម្នាក់ បណ្តាលឲ្យត្រូវជើងរងរបួសធ្ងន់ បង្កឲ្យមានការភ្ញាក់ផ្អើល នៅម៉ោងរំលងអធ្រាត្រ ឈានចូលថ្ងៃទី១២ ខែតុលា ឆ្នាំ២០១៨ នៅក្នុងផ្លូវលំលេខ៣៤៥ ស្ថិតក្នុងសង្កាត់ទួលសង្កែ២ ខណ្ឌឫស្សីកែវ រាជធានីភ្នំពេញ។
ជនរងគ្រោះដែលរងរបួសបានឲ្យដឹងថា នៅមុនពេលកើតហេតុខ្លួន កំពុងតែដេញជនសង្ស័យជិះម៉ូតូ២គ្រឿង ដែលបានបើកគេចពីកម្លាំងប្រជាការពារ និងកម្លាំងអន្តរាគមន៍ខណ្ឌឫស្សីកែវ រហូតដេញតាមមកដល់ផ្លូវលំលេខ៣៤៥ ស្រាប់តែឮសំឡេងកាំភ្លើង ទើបដឹងថា ខ្លួនត្រូវបុរសម្នាក់តាមដេញបាញ់ពីក្រោយ ប្រមាណជា១០គ្រាប់ បណ្ដាលឲ្យចំជើងខាងស្ដាំរងរបួសដួលដេកនៅលើផ្លូវតែម្តង។
លោក គល់ យី អធិការនគរបាលខណ្ឌឫស្សីកែវ បានបញ្ជាក់ថា ភ្លាមៗបន្ទាប់ពីផ្ទុះអាវុធ កម្លាំងនគរបាលខណ្ឌចុះប្រតិបត្តិការឃាត់ខ្លួនជនសង្ស័យបាន រួចយកមកសួរនាំនៅអធិការនគបាលខណ្ឌ។
ភ្លាមៗនោះ ជនរងគ្រោះត្រូវបានរថយន្តសង្គ្រោះបន្ទាន់ ដឹកយកទៅសង្គ្រោះនៅឯមន្ទីរពេទ្យកាល់ម៉ែត។ ចំណែកជនបង្កឈ្មោះ ឡាយ អីុងឃីង អាយុ២៧ឆ្នាំ មុខរបរជា មន្ត្រីសមត្ថកិច្ច ។ ចំណែកជនរងគ្រោះឈ្មោះ លី រតនៈ ភេទប្រុស អាយុ៣៩ឆ្នាំ មុខរបរជាប្រជាការពារ ស្នាក់នៅផ្ទះគ្មានលេខ ផ្លូវលំ ភូមិក្រោលគោ សង្កាត់គីឡូម៉ែត្រលេខ៦ ។
ក្រោយពេលកើតហេតុ សមត្ថកិច្ចបានឃាត់ខ្លួនជនបង្កខាងលើ ដើម្បីយកទៅសួរនាំបន្ថែមទៀត នៅឯអធិការខណ្ឌឫស្សីកែវ។
នគរបាលខណ្ឌឫស្សីកែវបានឲ្យដឹងថា កម្លាំងសមត្ថកិច្ចល្បាតក្នុងមូលដ្ថានដើម្បីការពារ និងរក្សាសន្តិសុខជូនប្រជាពលរដ្ធ ខណៈនោះឃើញម៉ូតូពីរគ្រឿងមានការសង្ស័យឃាត់ តែពួកគេមិនឈប់ទើបដេញតាម ។ លុះមកដល់ពាក់កណ្តាលផ្លូវ ស្រាប់លេចមុខជនបង្កដកកាំភ្លើងបាញ់យកតែម្តង ៕ អរុណរះ
