កំពង់ស្ពឺ៖នៅថ្ងៃអាទិត្យ ទី២១ ខែតុលា ឆ្នាំ២០១៨ លោក លឹម ពុយ ទីប្រឹក្សាក្រសួងធនធានទឹក និងឧតុនិយម បានដឹកនាំក្រុមការងារបច្ចេកទេសរបស់ក្រសួង ចុះពិនិត្យទីតាំងទំនប់ចំការតែក្រោម ស្ថិតក្នុងឃុំចំបក់ ស្រុកភ្នំស្រួច ខេត្តកំពង់ស្ពឺ ដែលត្រូវជំនន់ទឹកភ្លៀងហូរច្រោះផ្តាច់តួទំនប់ប្រវែងប្រមាណ៤០ម៉ែត្រ ។
សូមបញ្ជាក់ថា នៅវេលាម៉ោងប្រមាណ១២ ថ្ងៃត្រង់ ថ្ងៃទី២០ ខែតុលា ឆ្នាំ២០១៨ មានការបាក់ទំនប់អាងទឹកមួយកន្លែងនៅតំបន់គិរីរម្យ-ចម្ការតែ ស្ថិតក្នុងឃុំចំបក់ ស្រុកភ្នំស្រួច ខេត្តកំពង់ស្ពឺ ។
ក្រោយពេលបាក់ បរិមាណទឹកដែលមានក្នុងអាងប្រមាណ១លានម៉ែត្រត្រីគុណ បានហូរធ្លាក់យ៉ាងគំហុកទៅកាន់ផ្នែកខាងក្រោម បណ្តាលឱ្យលង់ងាប់សត្វគោចំនួន១ក្បាល, បាត់ខ្លួនចំនួន២ក្បាល ខូចខាតដំណាំស្រូវ និងដំណាំស្វាយមួយចំនួនទៀត ។
ទំនប់អាងទឹកនេះ គឺសាងសង់ឡើងនៅក្នុងឆ្នាំ២០១៦ ដោយថវិកាសហគមន៍ សម្រាប់រក្សាទឹកទុកប្រើប្រាស់ ៕ចេស្តា