ជល់មាន់ចាញ់ហើយខឹងគេតាមទារលុយហៅកូននិងបក្ខពួកយកកាំបិតកាប់

ចែករំលែក៖

ខេត្តកំពង់ស្ពឺ៖ ករណីហឹង្សាដោយចេតនារវាងអ្នកលេងល្បែងជល់មាន់ផ្នាល់គ្នារហូតឈានដល់ថ្នាក់យកកាំបិតមកកាប់បណ្តាលឱ្យបុរសម្នាក់រងរបួសធ្ងន់នៅភូមិព្រៃពង្ររឃុំរកាកោះស្រុកគងពិសីខេត្តកំពង់ស្ពឺកាលពីវេលាម៉ោង៥និង១០នាទីល្ងាចថ្ងៃទី១០ខែវិច្ឆិកាឆ្នាំ២០១៨ ។

មន្ត្រីនគរបាលស្រុកគងពិសីបានឱ្យដឹងថានៅមុនពេលមានជំលោះពាក្យសម្តីរហូតឈានដល់ប្រើអំពើហឹង្សាយកកាំបិតទៅកាប់លើជនរងគ្រោះនោះគឺពួកគេបានយកមាន់មកប្រជល់គ្នានិងភ្នាល់ដាក់លុយ។នៅចំណុចភូមិឃុំកើតហេតុខាងលើហើយឈ្មោះប៊ុនសីហាក់ភេទប្រុសអាយុ២៦ឆ្នាំរស់នៅភូមិបឹងឃុំរកាស្រុកកណ្តាលស្ទឹងខេត្តកណ្តាលបានយកមាន់មកជល់ជាមួយមាន់របស់ឈ្មោះយ៉ុងផាត់ភេទប្រុសអាយុ៥២ឆ្នាំរស់នៅភូមិព្រៃពង្ររស្រុកគងពិសី។

ដោយភ្នាល់គ្នាក្នុងតម្លៃ៣០០ដុល្លាអាមេរិកហើយភ្នាល់គ្នាខាងក្រៅ២០០០ដុល្លាទៀតដោយសារមាន់ឈ្មោះយ៉ុងផាត់នោះចាញ់បានឱ្យកូនប្រុសរបស់គាត់ឈ្មោះផាត់វើយបីមាន់យកទៅផ្ទះបាត់ថែមទាំងមិនឱ្យលុយចាញ់ទៀតផង។ រហូតជនរងគ្រោះបានទារលុយស្រាប់តែយ៉ុងផាត់បានទូរស័ព្ទហៅកូនប្រុសដែលបីមាន់ទៅផ្ទះនោះឱ្យមកវិញព្រមទាំងឱ្យកូនហៅកម្មករឈ្មោះហុងហ៊ួតភេទប្រុសអាយុ២៦ឆ្នាំរស់នៅភូមិអង្គមេត្រីឃុំរលាំងគ្រើលស្រុកសំរោងទងយកទាំងកាំផ្គាស់និងដំបងមកព្រួតគ្នាវាយទៅជនរងគ្រោះបណ្តាលឱ្យរងរបួសប្រអប់ដៃឆ្វេងចេញឆ្នឹង។

ប្រភពបានបន្តថាដោយសារមានគេដែលទៅលេងជាមួយបានជួយឃាត់និងដឹកជនរងគេចនិងយកទៅសង្គ្រោះនៅឯមន្ទីរពេទ្យស្រុកណ្តាលស្ទឺង។ ជនសង្ស័យទាំងបីនេះកំពុងរត់គេចខ្លួនបច្ចុប្បន្នមន្ត្រីនគរបាលជំនាញស្រុកគងពិសីសហការជាមួយនគរបាលប៉ុស្តិ៍បន្តស្រាវជ្រាវនិងតាមចាប់ក្រុមជនសង្ស័យយកមកផ្តន្តាទោសតាមច្បាប់ ៕ សេនាស័ក្តិ