ភ្នំពេញ ៖ យុវជនម្នាក់ជិះម៉ូតូក្នុងល្បឿនលឿនជ្រុលទៅបុកនិងរ៉ឺម៉កបណ្តាលអោយក្រឡាប់ផកងាជើងនិងធ្វើអោយមនុស្ស២នាក់រងរបួសធ្ងន់។  ហេតុការណ៍​នេះបានកើតឡើងកាលពីវេលាម៉ោង៥និង១៥នាទីព្រឹក ថ្ងៃទី១៦ ខែវិច្ឆិកា ឆ្នាំ២០១៨ ស្ថិតនៅលើផ្លូវសហព័ន្ធរុស្សី ភូមិព្រៃទា សង្កាត់ចោមចៅ៣ ខណ្ឌពោធិសែនជ័យ ។

តាមប្រជាពលរដ្ឋ នៅកន្លែងកើតហេតុ បានឲ្យដឹងថា មុនកើតហេតុ គេបានឃើញម៉ូតូរុឺម៉ក លក់ពងទាកូន បើកតាមបណ្តោយផ្លូវ សហព័ន្ធរុស្សី ពីកើតទៅលិច លុះដល់ចំណុចខាងលើ ត្រូវបាន យុវជនម្នាក់ ជិះម៉ូតូ ZOOMER ពណ៌ស្វាយ ពាក់ស្លាកលេខ ភ្នំពេញ 1FD-9476​ បោះពួយល្បឿនលឿន ពីកើតទៅលិច ស្របទិសគ្នា មិនដឹងថា ងងុយដេកងោក ឬស្រវឹងនោះទេ ទើបជ្រុលទៅបុក ម៉ូតូរុឺម៉ក ទាំងកំរោល បណ្តាលឲ្យក្រឡាប់ផ្ងារជើង រងរបួសសងខាង ។

ស្របពេលដែល ភាគីទាំង២ ជួបបញ្ហាគ្រោះថ្នាក់ ជនរងគ្រោះទៅពេទ្យអស់ សម្ភារៈបន្សល់ទុកនៅកណ្តាលផ្លូវ មិនទាន់ឃើញសមត្ថកិច្ច ចាត់ការយកចេញ ស្រាប់តែមានរថយន្តមួយគ្រឿង ផ្សេងទៀត បើកពីកើតទៅលិចដែរនោះ លឿនជ្រុលទៅបុកកៀរ ម៉ូតរុឺម៉កបន្ថែមទៀត រងខូចខាតតិចតួច ខ្ចិលរវល់ រថយន្តបន្តដំណើរទៅបាត់ ។

ក្រោយកើតហេតុសមត្ថកិច្ចបានចុះទៅធ្វើការវាស់វែង យកម៉ូតូ រុឺម៉ក ទៅរក្សាទុកនៅផ្នែកជំនាញ អធិការដ្ឋានខណ្ឌ រង់ចាំ ដោះស្រាយពេលក្រោយ ៕ សុខាសែនជ័យ