ខេត្តបន្ទាយមានជ័យ ៖ កម្លាំងនគរបាលការិយាល័យប្រឆាំងបទល្មើសសេដ្ឋកិច្ច នៃស្នងការដ្ឋាននគរបាលខេត្តបន្ទាយមានជ័យ បានឃាត់រថយន្ត១គ្រឿងម៉ាក FOD RAGER ពីរបាំង ចង្កូតស្តាំ ពណ៌ប្រផេះ ផលិតនៅឆ្នាំ២០១៦ នៅលើផ្លូវជាតិលេខ៥ ស្ថិតក្នុងភូមិយាងថ្មី ឃុំកូប ស្រុកអូរជ្រៅរួច បញ្ជូនមកស្នងការដ្ឋាននគរបាលខេត្តបន្ទាយមានជ័យ ។
ប្រតិបត្តិការនេះប្រព្រឹត្តទៅកាលពីព្រឹកថ្ងៃ សុក្រ ៨ រោច ខែកត្តិក ឆ្នាំ ច សំរឹទ្ធិស័ក ព.ស.២៥៦២ ត្រូវនឹងថ្ងៃទី៣០ ខែវិចិ្ឆកា ឆ្នាំ២០១៨ម្សិល ដោយអនុវត្តតាមបទបញ្ជារបស់លោកឧត្តមសេនីយ៍ទោអាត់ ខែម ស្នងការនគរបាលខេត្តបន្ទាយមានជ័យ និងមានការសម្របសម្រួលពីលោកមាស ច័ន្ទពិសិដ្ឋ ព្រះរាជអាជ្ញាអមសាលាដំបូង ខេត្តបន្ទាយមានជ័យ។
លោកវរសេនីយ៍ទោ រស់ រៀម នាយការិយាល័យ ស្តីទីនគរបាលសេដ្ឋកិច្ចបានឲ្យដឹងថា រថយន្តចង្កូតស្តាំ ដែលឃាត់នេះ សង្ស័យអ្នកទិញយកមកប្រើប្រាស់គ្មានពន្ធនាំចូល និងប្រើប្រាស់ប័ណ្ណសម្គាល់យានយន្តក្លែងក្លាយទៀត។
បើតាមការសាកសួរ អ្នកបើកបររថយន្តឈ្មោះ នាង សារឿន ភេទប្រុស អាយុ៥២ឆ្នាំ នៅភូមិបឹងស្នោរ ឃុំស្លក្រាម ស្រុកស្វាយចេក បានប្រាប់សមត្ថកិច្ចថា ប្រហែលមួយសប្តាហ៍មុន ខ្លួនបានដូរដីយករថយន្តនេះជាមួយឈ្មោះស៊ុន សារឿន ភេទប្រុស អាយុ៥៨ឆ្នាំ នៅ ភូមិយាងថ្មី ឃុំកូប ស្រុកអូរជ្រៅ ដោយខ្លួនបានប្រគល់ដីឲ្យឈ្មោះស៊ុន សារឿន ចំនួន៣ហិកតា នៅភូមិក្តិបថ្ម ឃុំគោករមៀត ស្រុកថ្មពួក ជាថ្នូរនិងរថយន្ត FOD RAGER នេះ តម្លៃ២ម៉ឺនដុល្លាអាមេរិក។
ចំណែកចម្លើយឈ្មោះ ស៊ុន សារឿន បាននិយាយថា រយៈពេលប្រហែលជាបីខែមុន ខ្លួនបានដូរដីជាមួយនិងរថយន្ត FOD RAGER នេះ ជាមួយឈ្មោះ ជា សុខុម ភេទប្រុស មុខរបរជាយោធា នៅឯឃុំស្មាច់ ខេត្តឧត្តរមានជ័យ ដោយប្រគល់ដីចំនួន១ហិកតាកន្លះ នៅភូមិបឹងស្នោរ ឃុំស្លក្រាម ស្រុកស្វាយចេក ជាថ្នូរនិរងរថយន្ត FOD RAGER នេះដែរ។
ក្រោយពីដូរបានខ្លួនបានពឹងពាក់ប្អូនធម៌នៅភ្នំពេញ ធ្វើស្លាកលេខនិងប័ណ្ណសម្គាល់រថយន្ត ក្នុងតម្លៃ៥ពាន់ដុល្លារឲ្យប្អូនធម៌គាត់រកពឹងគេជួយធ្វើឲ្យ។ ពេលធ្វើប័ណ្ណសម្គាល់យានយន្តនិងស្លាកលេខក្លែងក្លាយគាត់បានព្យាយាមទូរស័ព្ទទៅកាន់អ្នកធ្វើតែទូរស័ព្ទមិនចូល ក្រោយមកឮថា អ្នកធ្វើនោះត្រូវបានសមត្ថកិច្ចចាប់ពីបទធ្វើប័ណ្ណយានយន្តនិងស្លាកលេខក្លែងក្លាយ។
នាយការិយាល័យស្តីទី ក៏បានបញ្ជាក់ថា ដោយផ្អែកលើឯកសារពាក់ព័ន្ធដែលដកហូតបាន និងចម្លើយសារភាពរបស់ឈ្មោះ នាង សារឿននិងឈ្មោះស៊ុន សារឿន ជនទាំង២នាក់នេះ គឺពិតជាប្រើប្រាស់ប័ណ្ណសម្គាល់យានយន្តក្លែងក្លាយប្រាកដមែន ។
បច្ចុប្បន្នជនទាំង២នាក់ រួមនិងរថយន្ត ត្រូវបានបញ្ជូនទៅសាលាដំបូងខេត្ត ដើម្បីចាត់វិធានការច្បាប់ ៕ សហការី
