មន្ត្រីរដ្ឋាភិបាលថ្លែងថា យ៉ាងតិច១២នាក់ត្រូវបានសម្លាប់ កាលពីថ្ងៃសុក្រ ក្នុងនោះ ៦នាក់ជាប៉ូលិស ខណៈដែលការបាញ់ប្រហារមួយកើតឡើងទាំងវេលាព្រឹកតែម្តង រវាងប៉ូលិស នឹងក្រុមចោរប្លន់ធនាគារ នៅទីក្រុងតូចមួយ ភាគខាងជើងប្រទេសប្រេស៊ីល ។
កាសែតក្នុងស្រុកបានផ្សាយថា ចំណាប់ខ្មាំង៥នាក់ ក្នុងនោះមានក្មេង២នាក់ផងដែរបានស្លាប់ ក្នុងការផ្ទុះអាវុធនេះ ពេលដែលប៉ូលិសបានអន្តរាគមន៍ក្រុមចោរដែលព្យាយាមចូលប្លន់ទូ ATMs នៃសាខាធនាគារចំនួន២ ស្ថិតនៅតាមបណ្តោយមហាវិថី ក្នុងទីក្រុង Milagres រដ្ឋ Ceará ។
ថ្លែងតាមទូរស័ព្ទជាមួយភ្នាក់ងារ រ៉យទ័រ ស្ត្រីអ្នកនាំពាក្យរដ្ឋាភិបាលប្រេស៊ីល បញ្ជាក់ថា ព័ត៌មានបឋមរបស់យើង គឺថា មនុស្ស១២នាក់បានស្លាប់ ក្នុងនោះ៦នាក់ ជាមន្ត្រីប៉ូលិស ។
គេហទំព័រ G1 News ដកស្រង់ប្រភពមន្ត្រីជាន់ខ្ពស់ថ្លែងថា ចំណាប់ខ្មាំងទាំង៥នាក់មកពីគ្រួសារអ្នកជំនួញតែមួយ គឺរថយន្តរបស់ពួកគេត្រូវបានប្លន់ដោយក្រុមចោរ ដែលនៅជិតផ្លូវហាយវ៉េ ហើយពួកក្រុមចោរក៏នាំយកពួកគេទៅជាមួយ ។
ប៉ូលិសបានចាប់ខ្លួនជនសង្ស័យ២នាក់ ។ ប៉ូលិសក៏បានរកឃើញខ្មោចចោរប្លន់ម្នាក់នៅក្នុងឡាន ដែលគេបោះបង់ចោល ។ ពួកចោររត់គេចខ្លួនតាមរថយន្ត២គ្រឿង ដោយយកមិនបានលុយនោះទេ ។ ប៉ូលិសជាន់ខ្ពស់ប្រេស៊ីសបានថ្លែងថា ពេលនេះ ប៉ូលិសបាននិងកំពុងស្វែងរកបក្ខពួកចោរប្លន់ ៕
