ខេត្តស្វាយរៀង ៖ យ៉ាងហោចណាស់ ចំការអំពៅស្ករចំនួន៨៣ហិកតាត្រូវបានអណ្តាតភ្លើងឆាបឆេះបង្កការភ្ញាក់ផ្អើលដល់កម្មករនាំគ្នាជួយពន្លត់ប៉ុន្តែមិនអាចគ្រប់គ្រងស្ថានការណ៍បានទេ ព្រោះភ្លើងឆេះពេញក្រមុំទៅហើយ ។

ហេតុការណ៏នេះកើតឡើងកាលថ្ងៃអង្គារ៍ ៨កើត ខែមាឃ ឆ្នាំច សំរឹទ្ធស័ក្តិ ព.ស ២៥៦២ពីវេលាម៉ោង១១ព្រឹក នៅថ្ងៃទី១២ ខែកុម្ភៈ ឆ្នាំ២០១៩ស្ថិតនៅក្នុង ឃុំគគីរសោម ស្រុកស្វាយទាប ខេត្តស្វាយរៀង។

បើតាមលោក កុយ សារ៉េន ម្ចាស់ចំការអំពៅបានឲ្យដឹងថា មុនពេលមានភ្លើងឆេះគេឃើញមានកម្មករកំពុងកាប់អំពៅ និងមានម៉ាស៊ីនច្រូតក៏កំពុងតែច្រូតផងស្រាប់តែសុខៗមានជាអណ្តាតភ្លើងឆេះយ៉ាងសន្ធោសន្ធៅហើយស្លឹកអំពៅហោះរាយប៉ាយពិបាកគ្រប់គ្រងខ្លាំងណាស់។

លោកបានបន្តទៀតថា ខណៈដែលភ្លើងកំពុងឆេះនោះក្រុមកម្មករនាំគ្នារត់មកការដ្ឋានដើម្បីមកយកអាត្រាក់ទ័រភ្ជួរកាត់ចំការអំពៅនិងបាញ់ទឹកប៉ុន្តែមិនបានជោគជ័យនោះទេដោយសារមានខ្យល់បក់ហើរស្លឹកអំពៅដែលឆេះមកកាត់មុខអាត្រាក់ទ័រ ហើយការឆេះនោះវាលឿនពេកកម្មករស្ទើររត់ពុំរួចផងដោយចំការអំពៅក្រុមហ៊ុនរបស់គាត់ ឆេះអស់ចំនួនប្រមាណ ៥៧ហិចតានិងរបស់ក្រុមហ៊ុន សុផាត សំណាង អស់ចំនួន ២៦ ហិចតាផងដែរ។

លោកបានបញ្ជាក់ទៀតថា ភ្លើងរលត់ទៅវិញនៅម៉ោង ២:២០ នាទីរសៀលថ្ងៃដដែល ហើយមូលហេតុបណ្តាឲ្យឆេះនេះមិនដឹងច្បាស់ថាជាករណីឆេះដោយសារធម្មជាតិ ឬមានអ្នកលួចដុត ឬជក់បារីបោះកន្ទុយបារីនោះទេ បច្ចុប្បន្ននេះសមត្ថកិច្ចកំពុងធ្វើការស្រាវជ្រាវបន្តទៀត ៕ ដោយ ៖ យឹម ស៊ីថាន