ភ្នំពេញ៖ ស្ត្រី២នាក់និងបុរសចំណាស់ម្នាក់ជាសន្តិសុខបានរងរបួសធ្ងន់ ដោយសារតែបុរសម្នាក់ស្រវឹងបើករថយន្តកូរ៉េក្នុងល្បឿនលឿនទៅបុកបញ្ឆិតរថយន្តឡង់គ្រីសស័រហើយជ្រុលចង្កូតទៅបុករះជញ្ជាំងផ្ទះ ប្រជាពលរដ្ឋ និងម៉ូតូ៣គ្រេឿងទៀត ចំណែកឯរថយន្តបង្កហេតុបាន ក្រឡាប់ផ្ងារជើងរងការខូចខាតយ៉ាងដំណំ ។

ហេតុការណ៍គ្រោះថ្នាក់ចរាចរណ៍នេះបានកើតឡើង កាលពីវេលាម៉ោង២២ និង៤០នាទីយប់ថ្ងៃទី៨ ខែធ្នូ ឆ្នាំ២០១៥ នៅចំណុចអាហារដ្ឋានទីក្រុងស៊ុប១១១១ ក្បែរសាលាខណ្ឌឬស្សីកែវ តាមបណ្តោយផ្លូវជាតិលេខ៥ ស្ថិតក្នុងសង្កាត់គីឡូម៉ែត្រលេខ៦ ខណ្ឌឬស្សីកែវ រាជធានីភ្នំពេញ ។

ប្រភពពត៍មានពីកន្លែងកើហេតុបានអោយដឹងថា មុនពេលកើតហេតុគេបានឃើញរថយន្តម៉ាក HYUNDAI កូរ៉េ ពណ៍ខៀវ ពាក់ស្លាកលេខ ភ្នំពេញ2G-5815មួយគ្រេឿងបើកបរដោយបុរសម្នាក់ស្រវឹងជោគជាំ បានបើកក្នុងល្បេឿនយ៉ាងលេឿនទិសដៅពីជើងទៅត្បូងដោយមិនមានការប្រុងប្រយ័ត្ន ពេលមកដល់ចំណុចកើតហេតុបានបុកចំបញ្ឆិតពីមុខចំហៀងខាងឆ្វេង រថយន្តឡង់គ្រីស័រ ពណ៍ខ្មៅពាក់ស្លាកលេខភ្នំពេញ 2K-9282 ដែលទើបតែចេញពីហាងក្បែរ នឹងកន្លែងកើតហេតុបណ្តាលអោយរងការខូចខាតផងដែរ ហើយអ្នកបើករថយន្តបង្កបានបួងចង្កូតរថយន្តទៅបុករះជញ្ជាំងហាង និងម៉ូតូ៣គ្រេឿងផ្សេងទៀតដែលចតនៅមុខហាង បណ្តាលអោយស្ត្រី២នាក់ និងបុរសចំណាស់ជាសន្តិសុខម្នាក់ត្រូវ
រងរបួសធ្ងន់ ចំណែករថយន្តបង្កបានក្រឡាប់បះជើងនៅនឹងកន្លែងកើតហេតុតែម្តង ។

ប្រភពបន្តថា ក្រោយពីបង្កហេតុអ្នកបើករថយន្តបង្កបានព្យាយាមរត់គេចខ្លួនតែត្រូវសមត្ថកិច្ចដេញឃាត់បាន រីឯអ្នករងគ្រោះទាំង៣នាក់ត្រូវបានរថយន្តសាមុយដឹកយកទៅសង្គ្រោះនៅមន្ទីរពេទ្យផងដែរ ។

ក្រោយមកសមត្ថកិច្ចជំនាញបានមកធ្វើការវាស់វែង រួចយករថយន្តទាំង២គ្រេឿងនិងម៉ូតូ៣គ្រេឿង រួមទាំងជនបង្កទៅការិយាល័យចរាចរណ៍ជើងគោករាជធានីភ្នំពេញ ដើម្បីចាត់ការទៅតាមផ្លូវច្បាប់ ៕

ដោយ៖ ព្រែកជ័យ