លោក ចាន់ យុត្ថា ដឹកនាំមន្ត្រីបច្ចេកទេសយកគ្រឿងចក្រធុនធ្ងន់កាយស្រះបាតស្ទឹងចាស់ចំនួន៩កន្លែង ស្ថិត ស្រុកសង្កែ ខេត្តបាត់ដំបង

ចែករំលែក៖

ខេត្តបាត់ដំបង ៖ អនុវត្តតាមការចង្អុលបង្ហាញរបស់លោក លឹម គានហោ រដ្ឋមន្ត្រីក្រសួងធនធានទឹក និងឧតុនិយម នៅព្រឹកថ្ងៃអង្គារ ១៥កើត ខែមាឃ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី ១៩ ខែកុម្ភៈ ឆ្នាំ ២០១៩ នេះ លោក ចាន់ យុត្ថា រដ្ឋលេខាធិការរបស់ក្រសួង និងលោកប្រធានមន្ទីរធនធានទឹក និងឧតុនិយមខេត្តបាត់ដំបង ព្រមទាំងមន្ត្រីបច្ចេកទេស បានដឹកនាំគ្រឿងចក្រធុនធ្ងន់ដើម្បីកាយស្រះបាតស្ទឹងចាស់ចំនួន៩កន្លែង ស្ថិតក្នុង​ឃុំតាប៉ុន ស្រុកសង្កែ ខេត្តបាត់ដំបង ។

លោក យឿម រ៉ាន់ អនុប្រធានភូមិបឹងទឹម បានជម្រាបជូនលោករដ្ឋលេខាធិការថា ស្ទឹងចាស់នេះ គឺមានការគោករាក់អស់ពេលជាយូរណាស់មកហើយ ។ ប៉ុន្តែបន្ទាប់ពីក្រសួងធនធានទឹក និងឧតុនិយម បានធ្វើការស្តារឡើងវិញ នៅឆ្នាំកន្លងមក ក៏ដូចជាឆ្នាំនេះ ស្ទឹងចាស់ បានចាប់មានទឹកបរិបូណ៍សម្រាប់ប្រជាពលរដ្ឋប្រើប្រាស់ឡើងវិញ ។ លោកអនុប្រធានភូមិបន្តថា ដោយសារឆ្នាំនេះ បងប្អូនផលិតស្រូវប្រាំងច្រើន ហើយប្រជាពលរដ្ឋបានបូមយកទឹកពីស្ទឹង ទៅស្រោចស្រពស្រែប្រាំងរបស់ពួកគាត់ ទើបធ្វើឲ្យស្ទឹងនេះរីងគោក ។

លោកអនុប្រធានភូមិបន្តទៀតថា ជាទម្លាប់របស់ប្រជាពលរដ្ឋនៅតំបន់នេះ ក្នុងរដូវប្រាំងដែលខ្វះខាតទឹកប្រើប្រាស់ គឺបងប្អូនប្រើចប ឬប៉ែល ជីកបាតស្ទឹង ដើម្បីទាញយកជម្រាបទឹកចេញមកប្រើប្រាស់ ។ នៅឆ្នាំនេះ លោកអនុប្រធានភូមិ ក្នុងនាមប្រជាពលរដ្នក្នុងភូមិបឹងទឹមទាំងមូល មានសេចក្តីត្រេកអរ និងសូមគោរពថ្លែងអំណរគុណយ៉ាងជ្រាលជ្រៅចំពោះលោករដ្ឋមន្ត្រី លឹម គានហោ ដែលបានជួយស្តារស្ទឹងចាស់នេះឡើងវិញនាពេលកន្លងមក ហើយនៅពេលនេះទៀត បានចាត់បញ្ជូនគ្រឿងចក្រជួយកាយស្រះទាញយកជម្រាបទឹកចេញទាំង៩កន្លែងនេះ មកជូនបងប្អូនប្រជាពលរដ្ឋក្នុងភូមិប្រើប្រាស់ ។

សូមបញ្ជាក់ផងដែរថា ស្រះទឹកនីមួយៗក្រុមការងារគ្រោងនឹងជីកក្នុងទំហំជាមធ្យម ៖ បណ្តោយ ១៥ម៉ែត្, ទទឹង ០៧ម៉ែត្ និងជម្រៅ ២,៥០ម៉ែត្រ ៕


ចែករំលែក៖
ពាណិជ្ជកម្ម៖ ads2 ads3 ambel-meas ads5 ads6 scanpeople ads7 fk Print