ភ្នំពេញ ៖ រថយន្តយីឌុបធុនយក្សមួយគ្រឿង ដែលគេដឹងថាបើកបរដោយបុរសម្នាក់ រួមជាមួយស្ត្រីម្នាក់ បានដឹក​ឥវ៉ាន់សំពីងសំពោងសង្ស័យដឹកលើសចំណុះ ខណះដល់ផ្លូវបែកជាបួនបួងចង្កូតមិនទាន់ជ្រុលទៅបុកទំលុះចូល​ហាង​​​លក់ទូរសព្ទមួយកន្លែងបណ្ដាលឲ្យរងការខូចខាតយ៉ាងដំណំ  សំណាងល្អមិនបណ្ដាលឲ្យម្ចាស់ហាង និងអ្នកបើកបររងរបួសនោះទេ ។

      ហេតុការណ៍គ្រោះថ្នាក់ចរាចរណ៍ខាងលើនេះ បានកើតឡើងកាលពីវេលាម៉ោង១២ និង២០នាទីរំលងអធ្រាត​ឈានចូលថ្ងៃពុធ ៨រោច ខែមាឃ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី២៧  ខែកុម្ភៈ ឆ្នាំ២០១៩ នៅត្រង់ចំណុចស្ទុបចំការដូង តាមបណ្ដោយផ្លូវ២១៧កែងនិងផ្លូវព្រៃសរ ស្ថិតក្នុងសង្កាត់ដង្កោ ខណ្ឌដង្កោ រាជធានីភ្នំពេញ  ។

      យោងតាមប្រភពពីកន្លែងកើតហេតុបានឲ្យដឹងថា មុនពេលកើតហេតុគេឃើញប្ដីប្រពន្ធពីរនាក់បើករថយន្តយីឌុបមួយគ្រឿង ពាក់ស្លាកលេខ តាកែវ 3A -1959 បានដឹកឥវ៉ានសំពីងសំពោងកំពស់ប្រហែល៥ម៉ែត្រ បានធ្វើដំណើរផ្លូវបេតុងព្រៃសរ ទិសដៅពីលិចទៅកើតក្នុងល្បឿនមធ្យម ខណះមកដល់ចំនុចកើតហេតុខាងលើបានបួងចង្កូតមកខាងឆ្វេងឡើងផ្លូវ២១៧ តែដោយសារផ្ទុកលើសចំណុះមិនមកបាន ក៏បណ្ដាលឲ្យបុកទំលុះចូលហាងលក់ទូរសព្ទ័លិចក្បាលរថយន្តបាត់តែម្ដង បណ្ដាលឲ្យរថយន្តបង្ក និងសម្ភារៈក្នុងផ្ទះរងការខូចខាតយ៉ាងដំណំ។