ខេត្តព្រៃវែង ៖ បន្ទាប់ពីមានបញ្ហាពុលស្រានៅខេត្តក្រចេះបណ្តាលឲ្យមានមនុស្សស្លាប់កន្លងទៅបានស្ងប់ស្ងាត់បន្តិចហើយនោះ ឥឡូវនេះនៅខេត្តព្រៃវែង មានមនុស្ស៧២នាក់ បានពុលនំបញ្ចុកក្នុងកម្មវិធីបុណ្យមួយ តែមិនបណ្តាលឲ្យនរណាម្នាក់បាត់បង់ជីវិតនោះទេ គ្រាន់តែចុកពោះ ក្អួតចង្អោរ និងរាករូសប៉ុណ្ណោះ ។
ហេតុការណ៍នេះកើតឡើងកាលពី ថ្ងៃចន្ទ ១៣ រោច ខែមាឃ ឆ្នាំ ច សំរឹទ្ធិស័ក ព.ស.២៥៦២ ត្រូវនឹងថ្ងៃទី៤ ខែមីនា ឆ្នាំ ២០១៩ក្នុង កម្មពិធីបុណ្យសព ៧ថ្ងៃររបស់ឈ្មោះ ប៉ាន់ យ៉ាន់ ភេទប្រុស នៅភូមិថ្កោល ឃុំបឹងដោល ស្រុកព្រះស្តេច ខេត្តព្រៃវែង ។
ប្រភពព័ត៌មានពីប្រជាពលរដ្ឋក្នុងភូមិថ្កោលបានឲ្យដឹងថា ក្នុងកម្មពិធីបុណ្យនេះ ម្ចាស់ដើមបានរៀបចំនំបញ្ចុកសម្រាប់ទទួលភ្ញៀវទទួលទាន។ ក្រោយពីភ្ញៀវទទួលទាននំបញ្ចុករួច ស្រាប់តែម្នាក់ៗ មានអការ:មិនស្រួលខ្លួនដោយខ្លះចុកពោះ ក្អួតចង្អោរ និងរាករូស ទើបបញ្ជូនទៅសង្គ្រោះនៅមន្ទីរពេទ្យ ។ រហូតមកដល់ ថ្ងៃទី៥ ខែមីនា ឆ្នាំ២០១៩ មនុស្សដែលពុលមានចំនួន៧២នាក់ ក្នុងនោះស្រីរ៤២នាក់ ត្រូវបានអាជ្ញាធរមូលដ្ឋាន ជួយសង្រ្គោះ ដឹកយកទៅសម្រាកព្យាបាល នៅមណ្ឌលសុខភាព និង ក្រុមគ្រូពេទ្យចុះទៅព្យាបាល ដល់កន្លែងបុណ្យតែម្តង ។
មន្រ្តីសុខាភិបាលស្រុកព្រះស្តេចបានឲ្យដឹងថា នំបញ្ចុកដែលម្ចាស់បុណ្យធ្វើទទួលភ្ញៀវនេះមានជាតិម្សៅជូរខ្លាំងគ្មានអនាម័យ គួបផ្សំនឹងល្បោយលាងទឹកមិនស្អាតទៀត ទើបបង្កឲ្យជាតិពុលយ៉ាងនេះ ៕ ប្រាថ្នា
