ខេត្តស្ទឹងត្រែង ៖ នៅថ្ងៃព្រហស្បតិ៍នេះ ជនជាតិឡាវម្នាក់ដែលបានលបលួចនាំយកថ្នាំញៀននិងឆ្លងដែនខុសច្បាប់ចូលទឹកដីកម្ពុជា ត្រូវបានកម្លាំងកងរាជអាវុធហត្ថខេត្តចាប់ឃាត់ខ្លួនបាននៅ ចំណុចស្ពានទី២ ភូមិខាំផាន់ សង្គាត់សាមគ្គី ក្រុងស្ទឹងត្រែង នៅថ្ងៃទី០៧ ខែមីនា ឆ្នាំ២០១៩នេះ ។
លោកឧត្តមសេនីយ៍ត្រី អៀង វ៉ាន់ឌី មេបញ្ជាការអាវុធហត្ថខេត្តដែលដឹកនាំបង្ក្រាបករណីនេះផ្ទាល់អោយដឹងថា វត្ថុតាងដែលចាប់យកបានជាប្រភេទថ្នាំញៀនមេតំហ្វេតាមីន (WY) ចំនួន៣៩ កញ្ចប់ ស្មើ៧៦៨៣គ្រាប់ មាទម្ងន់សុទ្ធ៧៩៣,៣ ក្រាម ,លុយក្លែងក្លាយ១០០ដុល្លារ, លុយបាតថៃ៣,០០០បាត និងទូរស័ព្ទអិនចុចពិល២គ្រឿង។
លោកមេបញ្ជាថា ប្រតិបត្តិការនេះធ្វើឡើងនៅចំណុចស្ពានទី២ ភូមិខាំផាន់ សង្គាត់សាមគ្គី ក្រុងស្ទឹងត្រែង នៅពេលដែលជនសង្ស័យរូបនេះព្យាយាមលួចឆ្លងដែន និងនាំយកគ្រឿងញៀនចូល មកប្រទេសកម្ពុជា ។
ក្រោយការឃាត់ខ្លួននិងសាកសួរទេីបដឹងថា ជនសង្ស័យឈ្មោះ ប៊ុន ម៉ា ភេទប្រុស អាយុ ៤៣ឆ្នាំ ជនជាតិឡាវ មានទីលំនៅភូមិបានដន ស្រុកផូនហូង ក្រុងវៀងច័ន្ទ ប្រទេសឡាវ។
បច្ចុប្បន្នជនសង្ស័យ និងវត្ថុតាងត្រូវបានមន្ត្រីកងរាជអាវុធហត្ថកសាងសំណុំរឿងត្រៀមបញ្ជូនជននេះទៅសាលាដំបូងខេត្តស្ទឹងត្រែងដេីម្បីចាត់ការបន្ដតាមនីតិវិធី៕ដោយ ៖ មាស សុផាត
