ខេត្តសៀមរាប៖ បុរសជាជនបរទេសពីរនាក់និងខ្មែរឥស្លាមម្នាក់ ត្រូវកម្លាំងនគរបាលព្រហ្មទណ្ឌខេត្ត ចាប់ឃាត់ខ្លួនរួចបញ្ជូនទៅតុលាការពាក់ព័ន្ធនឹងការបើកកន្លែងលេងល្បែងស៊ីសង កាលពីវេលាម៉ោង១១ យប់ ថ្ងៃទី៧ ខែធ្នូ ឆ្នាំ២០១៥ នៅចំណុចផ្សារភ្ញាជ័យ ភូមិភ្ញាជ័យ សង្កាត់ស្វាយដង្គំ ក្រុងសៀមរាប ។
ប្រភពពីមន្ត្រីនគរបាលបានឲ្យដឹងថា ជនសង្ស័យដែលត្រូវឃាត់ខ្លួនទាំង៣នាក់គឺ ទី១ ឈ្មោះ Sya Didy Binsallehuddin ភេទប្រុស អាយុ៣២ឆ្នាំ , ទី២ ឈ្មោះ Goh Joo Sheng ភេទប្រុស អាយុ៣២ឆ្នាំ ទាំង២នាក់ជាជនជាតិម៉ាឡេស៊ី និងទី៣ ឈ្មោះ នី សុហ្វ្រី ភេទប្រុស អាយុ៣០ឆ្នាំ ជាខ្មែរឥស្លាម ។
ប្រភពបន្ដថា ការឃាត់ខ្លួនជនសង្ស័យទាំង៣នាក់ គឺដោយសារនគរបាលបានស្រាវជ្រាវរកឃើញថា ពួកគេមានជាប់ពាក់ព័ន្ធនឹងការបើកកន្លែងលេងល្បែងស៊ីសងខុសច្បាប់ប្រភេទហ្គេមបាញ់ត្រី។ ដោយឡែកក្រោយពីឃាត់ខ្លួន កម្លាំងក៏បានធ្វើតេស្ដឈ្មោះ GOH JOOS SHENG ក៏បានរកឃើញថា មានសារធាតុញៀនទៀត ។
បច្ចុប្បន្នជនសង្ស័យទាំង៣នាក់ ត្រូវកម្លាំងនគរបាលកសាងសំណុំរឿង បញ្ជូនខ្លួនទៅកាន់តុលាការ នៅព្រឹកថ្ងៃទី៩ ខែធ្នូ ឆ្នាំ២០១៥ ដើម្បីកសាងសំណុំរឿងចាត់ការតាមច្បាប់ ៕
ដោយ៖ សហការី
