ភ្នំពេញ៖ ក្រោយស្ងប់ស្ងាត់បញ្ចេញស្នាដៃផលិតតភាពយន្តអស់មួយរយៈពេលរួចមក ផលិតករល្បីឈ្មោះ លោក ចាន់ណា រ៉ូណាន បានបង្ហាញថ្ងៃចាក់បញ្ចាំងច្បាស់លាស់នូវរឿងថ្មីគឺរឿង”ឯណាខ្មោច?”។
អ្នកធ្លាប់គាំទ្រស្នាដៃផលិតករវ័យក្មេងរូបនេះកំពុងអន្ទះសាររងចាំថ្ងៃមកដល់នៃការចាក់បញ្ចាំងភាពយន្តបែបភ័យរន្ធត់នោះ ព្រោះតែពួកគេជឿជាក់លើគុណភាពភាពយន្តដែលផលិតករមួយនេះផលិតឡើងថានឹងមានអ្វីដែលថ្មីទាក់ចិត្តអ្នកទស្សនាជាក់ជាមិនខាន។
រឿង”ឯណាខ្មោច” ដែលទាំងផលិតករ និងសិល្បករដាក់ក្តីរំពឹងខ្ពស់ថានឹងស្រូបបានអ្នកចូលទស្សនាច្រើនកុះករនៅពេលខាងមុខព្រោះតែភាពយន្តនេះស្ថិតនៅក្រោមការសម្រិតសម្រាំងយ៉ាងពិសេសពីផលិតករលោក ចាន់ណារ៉ូណាន ដែលធ្លាប់ធ្វើឲ្យផ្ទុះកក្រើកវិស័យភាពយន្តលើរឿងជាច្រើនដូចជារឿង”កំណត់ហេតុនាងនាថ” រឿង”សសរកន្លោង”ជាដើម។
ត្រឹមតែការបញ្ចេញផ្ទាំងផ្សព្វផ្សាយលើកដំបូងដែលប្រកាសថាភាពយន្តនេះនឹងចាក់បញ្ចាំងជាផ្លូវការនៅថ្ងៃទី២១ខែមីនានេះប៉ុណ្ណោះ ក៏បានធ្វើឲ្យគេចាប់អារម្មណ៍ជាខ្លាំង បូករួមទាំងរូបថត និងវីដេអូឈុតក្រៅឆាកក៏មានការគាំទ្រយ៉ាងច្រើនផងដែរ។
លោកចាន់ណា រ៉ូណានភាពយន្តរឿង”ឯណាខ្មោច?”ដែលគឺជាភាពយន្តបែបភ័យរន្ធត់ ដែល បានរៀបចំពិធីក្រុងពាលី និងចេញថតចាប់តាំងពីអំឡុងខែសីហាឆ្នាំ២០១៨។ ភាពយន្តនេះ មានចូលរួមសម្តែងដោយតារាប្រុសស្រីល្បីឈ្មោះជាច្រើនមានដូចជា លោក ទ្រី តារាវុធ កញ្ញា សួង ស៊ីធឿន លោក ភី ម៉ៃ កញ្ញា យេយេ លោក សាតាន់ លោក ដូ រីកូ ជាដើម។
ភាពយន្តនេះនឹងត្រូវចាក់បញ្ចាំងក្នុងរោងភាពយន្តចាប់ពីថ្ងៃទី២១មីនាឆ្នាំ២០១៩នេះតទៅនៅគ្រប់រោងភាព យន្តទាំងអស់។លោកបញ្ជាក់ថាភាពយន្តនេះនិយាយអំពីក្រុមនិស្សិតមួយក្រុម ត្រូវមកចុះកម្មសិក្សា នៅមន្ទីពេទ្យបង្អែកដែលគេល្បីថាមានខ្មោចលងសាហាវ ចំយប់ដែលគេបញ្ជូនសពតៃហោង កូនស្រីសេដ្ឋីម្នាក់ ស្លាប់ដោយសារក្រឡាប់ឡានធ្លាក់ជ្រោះរក្សាទុកក្នុងមន្ទីពេទ្យនោះ។
នាយប់ស្ងាត់ពួកគេបានជួបខ្មោច ដែលអ្នកស្រុកតែងនិយាយថាចេញមកលងបន្លាចគ្រប់គ្នាៗ ពួកគេព្យាយាមរត់គេចខ្មោចទាំងអស់លង តែបែរជាជួបខ្មោចកូនស្រីលោកសេដ្ឋី បង្ហាញខ្លួន។
លោកថាខ្សែភាពយន្តនេះពោរពេញដោយឈុតឆាកបន្លាច និងកំប្លែងសើចចុកពោះ ដែលវាគឺជាវណ្ណកម្មថ្មីតម្រូវចិត្តអ្នកគាំទ្រស្នាដៃលោកកន្លងមក ហើយលោកជឿជាក់ថាភាពយន្តនេះនឹងទទួលបានជោគជ័យព្រោះតែគុណភាពនៃការផលិតត្រូវបានសម្រិតសម្រាំងយ៉ាងពិសេស ទាំងបច្ចេកទេសថត ការតុបតែងមុខ ការជ្រើសរើសតារាសម្តែង ទីតាំងថតគួរចាប់អារម្មណ៍ និងសាច់រឿងដ៏ល្អថ្មីប្លែកពីរឿងមុនៗ៕ ដោយ វឌ្ឍនា
