បើកម៉ូតូតាមផ្លូវប៉ះគ្នាតិចតួចកើតជាជម្លោះបង្ក​ហឹង្សាវាយគ្នា រួចចាក់យុវជនម្នាក់ចំដើមទ្រូង​ ឈាមហូរ​ស្រោច​ខ្លួន

ចែករំលែក៖

ភ្នំពេញ: បើកម៉ូតូតាមផ្លូវប៉ះគ្នាតិចតួចកើតជាជម្លោះបង្ក​ហឹង្សាវាយគ្នា រួចចាក់យុវជនម្នាក់ចំដើមទ្រូង​ ឈាមហូរ​ស្រោច​ខ្លួន​ ហេតុការណ៍នេះ​​ បង្ក​ឲ្យ​​មាន​ការ​ភ្ញាក់​ផ្អើល​​ឡើងកាលពី​ម៉ោង​ ១១និង៣០​នាទី​យប់​ថ្ងៃ​ទី​១៣​ ខែមិនា​ ឆ្នាំ​២០១៩ នៅតាមបណ្តោយផ្លូវកម្ពុជាក្រោមកែងផ្លូវម៉ៅសេទុង (​ស្តុប​សន្ធរម៉ុក​) ស្ថិតក្នុងសង្កាត់​ផ្សារ​ដេប៉ូ​ទី​២​ ខណ្ឌ​ទួលគោក​។

​ប្រភព​ពត៌មាន​ពី​សមត្ថកិច្ច​មូល​ដ្ឋាន​ បាន​ឲ្យ​ដឹង​ថា ​នៅ​មុន​ពេល​កើត​ហេតុ​ ​បុរសរងគ្រោះ​ និងមិត្តភក្តិ​ម្នាក់ បានជិះម៉ូតូ​មួយ​គ្រឿង​ម៉ាកយ៉ម៉ាហា​ ហ្វីណូ​ ពណ៌​ខៀវ​លាយស​ ពាក់ស្លាកលេខ​ ​ភ្នំពេញ​1CW-9188 ​។ លុះមក​ដល់​ខាង​មុខ​វិទ្យាល័យ​សន្ធរម៉ុក​ ម៉ូតូ​របស់​ជនរងគ្រោះ​ ក៏បាន​ជិះ​ទៅប៉ះ​ពារ​បន្តិច​បន្តួច​ជា​មួយ​និង​ម៉ូតូ​មួយគ្រឿង​ទៀត​ មិន​ចាំ​ម៉ាក​ ដែល​បើកបរ​ដោយ​យុវជន​ពីរ​នាក់​មិនស្គាល់អត្តសញ្ញាណ ហើយមើល​មុខ​ឌឺដង​ដាក់​គ្នា​ទៅ​វិញ​ទៅ​មក​ ក៏កើតជា​ជម្លោះរហូត​ឈានទៅ​ដល់​ការ​ប្រើ​​អំពើហិង្សា​វាយ​តប់​គ្នា​តែ​ម្ដង​។​

ភ្លាមនោះ​ក៏មាន​យុវជន​ម្នាក់​ ក្នុង​ចំណោម​ពីរនាក់​​ បាន​យក​ដែក​ចុងស្រួច​​ចាក់ទៅ​លើបុរស​រងគ្រោះ​​ចំ​ដើម​ទ្រូង​ខាងឆ្វេង​ បណ្តោយឲ្យ​រងរបួស​ឈាម​ហូរ​ស្រោច​ខ្លួន​។ ភ្លាម​ៗ​យុវជន​ដៃ​ដល់​រួម​ទាំង​បក្ខពួក​ក៏​បាន​នាំ​គ្នា ​ជិះ​ម៉ូតូ​រត់​គេច​ចេញ​ពី​កន្លែង​កើត​ហេតុ​បាត់​ស្រមោល​។ បន្ទាប់​មក​កម្លាំង​សមត្ថកិច្ច​មូល​ដ្ឋាន​ ក៏​ចុះ​ទៅ​​អន្តរាគមន៍​ដល់​កន្លែង​កើត​​ ស្រាប់​តែ​មិត្ត​ភក្តិ​ម្នាក់​របស់​បុរស​រងគ្រោះ ​បាន​ព្យាយាម​ជិះម៉ូតូ​ដឹក​ជនរងគ្រោះ​គេច​ពី​កន្លែង​កើតហេតុ​ តែត្រូវ​បាន​សមត្ថកិច្ច​ ជិះ​ដេញ​តាមឃាត់​ដើម្បី​​សួរ​នាំ។

បន្ទាប់ពី​កើតហេតុ​យុវជន​រងគ្រោះ ​ត្រូវបាន​មិត្ត​ភក្តិ​ដឹក​តាម​ម៉ូតូ​យក​ទៅ​សង្គ្រោះ​នៅ​ឯ​មន្ទីរពេទ្យ​កាល់ម៉ែត​ ដោយ​មិត្ត​ភក្តិ​ដែល​រួម​ដំណើរ​ជាមួយ​ត្រូវ​បាន​សមត្ថកិច្ច​ នាំ​​ទៅ​សាកសួរ​នៅ​ឯ​ប៉ុស្តិ៍​នគរបាល​រដ្ឋ​បាលផ្សារ​ដេប៉ូ​ទី​២​ ហើយឲ្យដាក់​ពាក្យ​បណ្ដឹង​ ដើម្បី​ឲ្យ​សមត្ថកិច្ច​ងាយ​ស្រួល​ក្នុង​ការ​ស្រាវជ្រាវ​វែកមុខ​ជន​សង្ស័យ​ យក​មក​ផ្តន្ទា​ទោស​ទៅតាម​ផ្លូវ​ច្បាប់​៕​ជ្រោយពេជ្រ

...


ចែករំលែក៖
ពាណិជ្ជកម្ម៖ ads2 ads3 ambel-meas ads5 ads6 scanpeople ads7 fk Print