អាកាសធាតុក្តៅខ្លាំង គ្រប់ដណ្តប់នៅតំបន់ភាគកណ្តាលប្រទេសអ៊ីស្រាអែល បង្កឲ្យមានភ្លើងឆេះព្រៃជាទ្រង់ទ្រាយធំ។ កម្លាំងពន្លិតអគ្គិភ័យអ៊ីស្រាអែលមិនទប់ស្កាត់ ការរាលដាល នៃភ្លើងឆេះព្រៃបានឡើយ ធ្វើឲ្យរដ្ឋាភិបាលព្រួយបារម្ភយ៉ាងខ្លាំង ។
នៅពេលនេះដែររដ្ឋាភិបាលអ៊ីស្រាអែល កាលពីថ្ងៃទី២៣ខែឧសភា បានអំពាវនាវដល់សហគមន៍អន្តរជាតិ ជួយពន្លិតភ្លើងឆេះព្រៃ រាប់សិបកន្លែងនៅតំបន់ភាគកណ្តាលប្រទេសនេះ ។ ភ្លើងឆេះព្រៃកើតឡើង ដោយសារតែអាកាសធាតុក្តៅដល់ទៅជាង៤០អង្សាសេ។
ភ្លើងឆេះព្រៃបានកម្ទេចផ្ទះពលរដ្ឋ ១៦ខ្នង និងធ្វើឲ្យពលរដ្ឋរាប់សិបពាន់នាក់ត្រូវភៀសខ្លួនទៅកាន់តំបន់មានសុវត្ថិភាព ។ ចរាចរណ៍ផ្លូវដែកក៏ត្រូវបានផ្អាក់ ធ្វើឲ្យអ្នកដំណើររងផលប៉ះពាល់យ៉ាងខ្លាំង។
នៅក្នុងសេចក្តីប្រកាស កាលពីថ្ងៃទី២៣ខែឧសភា នាយករដ្ឋមន្ត្រីអ៊ីស្រាអែល លោក Benjamin Netanyahu បានបញ្ជាឲ្យ ក្រសួងសន្តិសុខជាតិ និងក្រសួងការបរទេសអំពាវនាវឲ្យមានការជួយអន្តរគមន៍ពីបរទេស។ រដ្ឋាភិបាលបានបញ្ជូនក្រុមការងាទៅកាន់ប្រទេសជិតខាងសំជំនួយ ក្នុងនោះមាន ប្រទេសក្រិច Cyprus , Italy, Croatia ជាដើម។
រដ្ឋមន្ត្រីក្រសួងសន្តិសុខជាតិអ៊ីស្រាអែល បានបញ្ជាក់ថា ក្រុមពន្លិតអគ្គិភ័យប្រឈមនិងបញ្ហា ឧបស័គជាច្រើនដោយសារតែខ្យល់ខ្លាំង។ រដ្ឋាភិបាលក៏បានត្រៀមលក្ខណៈប្រកាសអាសន្នទូទាំងប្រទេសពីភ្លើងឆេះព្រៃនេះផងដែរ ប្រសិនបើស្ថានភាពភ្លើងឆេះព្រៃបន្តឆេះខ្លាំងនោះ ៕
