ភ្នំពេញ៖ ជនសង្ស័យចំនួន២នាក់ត្រូវបានសមត្ថកិច្ចប៉ុស្តិ៍ទឹកថ្លាស្រាវជ្រាវឃាត់ខ្លួនបានជាបន្តបន្ទាប់ដោយជាប់ពាក់ព័ន្ធប្រើប្រាស់គ្រឿងញៀនក្រោយពីសមត្ថកិច្ចបានឃាត់ខ្លួនជនសង្ស័យម្នាក់ឈ្មោះ ព្រំ ឧកញ៉ា រួម និងថ្នាំញៀនចំនួន៤កញ្ចប់ ។

ការឃាត់ខ្លួនជនសង្ស័យទាំង២នាក់នេះបានធ្វើឡើងកាលពីម៉ោង១១ និង១៥នាទីថ្ងៃទី១៨ ខែធ្នូ ឆ្នាំ២០១៥នៅចំណុចផ្លូវ១០១៩ ក្រុម២ ភូមិទឹកថ្លា១ សង្កាត់ទឹកថ្លា ខណ្ឌសែនសុខ ។

ជនសង្ស័យទី១ឈ្មោះ លី ពិសល់ ហៅវី អាយុ៣១ឆ្នាំមុខរបរមិនពិតប្រាដស្នាក់នៅបន្ទប់ជួល ក្រុម២ ភូមិទឹកថ្លា១ សង្កាត់ទឹកថ្លា ខណ្ឌសែនសុខ មានស្រុកកំណើតនៅភូមិរការក្រោម ឃុំរកា ស្រុកកំពង់ចាម ខេត្តកំពង់ចាម និងទី២ឈ្មោះ លី ពិសិដ្ឋ ហៅសាល អាយុ៣៣ឆ្នាំមុខរបរជាងកាត់សក់
ស្នាក់នៅភូមិបុរី១០០ខ្នង សង្កាត់ទឹកថ្លា ខណ្ឌសែនសុខ មានស្រុកកំណើតនៅភូមិដំណាក់ព្រីង ឃុំមហាលាភ ស្រុកកោះសូទិន ខេត្តកំពុងចាម ។

សមត្ថកិច្ចនិយាយថា មុននឹងឈានដល់ការឃាត់ខ្លួនជនសង្ស័យដែលប្រើប្រាស់គ្រឿងញៀនខាងលើនេះខណៈដែលសមត្ថកិច្ចបានឃាត់ជនសង្ស័យម្នាក់ ឈ្មោះ ព្រំ ឧកញ៉ា ភេទប្រុស អាយុ៣១ឆ្នាំមុខរបរមិនពិតប្រាកដស្នាក់នៅបន្ទប់ជួលលេខ១០ជាន់ទី១ ក្រុម២ ភូមិទឹកថ្លា១ សង្កាត់ទឹកថ្លាខណ្ឌសែនសុខ រួមទាំងវត្ថុតាង ថ្នាំញៀន៤កូនថង់តូច កាលពីល្ងាចថ្ងៃទី១៧ខែធ្នូនេះនៅបន្ទប់ផ្ទះជួល ហើយយកមកសាកសួរហើយជនសង្ស័យបានឆ្លើយសារភាពថាជនទាំង២នាក់ខាងលើនេះបានជាប់ពាក់ព័ន្ធនិងថ្នាំញៀននេះដែរទើបសមត្ថកិច្ចធ្វើការស្រាវជ្រាវនិងឃាត់ខ្លួនបានជាបន្តបន្ទាប់តែម្តង ។

បច្ចុប្បន្នជនខាងលើកំពុងធ្វើការសាកសួរនៅអធិការដ្ឋាននគរបាលខណ្ឌសែនសុខចាត់ការតាមនិតិវិធីបន្ត ៕

ដោយ៖ តុង សីហា