ភ្នំពេញ ៖ ជនសង្ស័យម្នាក់ ជាអ្នកនាំស្រីបម្រើសេវាផ្លូវភេទឲ្យភ្ញៀវនៅម្តុំផ្សារសូរិយ៉ា មិនកាកកប់ បែគំនិតធ្វើសកម្មភាពលួចគាស់ទ្វារថយន្តមួយគ្រឿងមិនទាន់បានសម្រេចផង ក៏ត្រូវកម្លាំងអធិការដ្ឋាននគរបាលខណ្ឌ៧មករា ឃាត់ខ្លួន ។
ករណីឃាត់ខ្លួនចោរប៉ុងលួចរថយន្តខាងលើនេះ បានធ្វើឡើងកាលវេលាម៉ោង២និង១៥នាទីរំលងអាធ្រាត្រឈានចូលថ្ងៃសុក្រ ៤រោច ខែជេស្ឋ ឆ្នាំកុរឯកស័ក ព.ស ២៥៦៣ ត្រូវនឹងថ្ងៃទី២១ ខែមិថុនា ឆ្នាំ២០១៩ នៅចំណុចមុកផ្ទះលេខ៣១៣EO ផ្លូវ១២៨ ភូមិ១០ សង្កាត់មិត្តភាព ខណ្ឌ៧មករា ។
ជនសង្ស័យឈ្មោះជា ទី ភេទប្រុស អាយុ៣៣ឆ្នាំ ជនជាតិខ្មែរ មុខរបរនាំស្រីអោយភ្ញៀវនៅម្តុំផ្សារសូរិយ៉ា សង្កាត់ផ្សារថ្មី២. ខណ្ឌដូនពេញ ស្នាក់នៅផ្ទះជួលសង្កាត់ផ្សារថ្មី២ ខណ្ឌដូនពេញ (ពិនិត្យទឹកនោមមានសារធាតុញៀន) ។ ចំណែកជនរងគ្រោះឈ្មោះ ទុយ វិចិត្រ ភេទប្រុស អាយុ៣០ឆ្នាំ មុខរបរជាអ្នកបើកបរ រថយន្តអោយក្រុមហ៊ុនឡូលែន ស្នាក់នៅក្រុមហ៊ុនឡូលែន ផ្ទះលេខ៣១៣Eo ផ្លូវ១២៨ ភូមិ១០ សង្កាត់មិត្ត ខណ្ឌ៧មករា ។
តាមប្រភពព័ត៍មានពីនគរបាលខណ្ឌ៧មករា បានឲ្យដឹងថា មុនពេលឃាត់ខ្លួនជនសង្ស័យខាងលើនេះ គឺកម្លាំងកំពុងតែជិះល្បាតការពារសុវត្ថិភាពជូនពលរដ្ឋក្នុងមូលដ្ឋាន លុះជិះមកដល់ចំណុចកើតហេតុ ស្រាប់តែឃើញជនសង្ស័យកំពុងតែធ្វើសកម្មភាពគាសទ្វាររថយន្តបំណងលួច ក៏ឃាត់ខ្លួនតែម្តង ។ វត្ថុតាងដកហូតរួមមាន ៖ ដែកឆ្កិះសោរចំនួន៤, ទុលរឺវិសចំនួន១កូនសោរពណ៌សចំនួន១ ។
បច្ចុប្បន្ន ជនសង្ស័យកំពុងឃាត់ខ្លួននៅអធិការដ្ឋាន ដើម្បីកសាងសំណុំរឿងបញ្ជូនទៅសាលាដំបូងរាជធានីភ្នំពេញ ៕ ស រស្មី
...
