ខេត្តកណ្តាល៖ បុរសម្នាក់បានសម្រេចចិត្តចង.កធ្វើអត្តឃាត ខណៈដែលកូនត្រូវរៀបមង្គលការនៅក្នុងអំឡុងខែកុម្ភៈ ឆ្នាំ២០១៦ ។ ជនរងគ្រោះត្រូវបានស្ត្រីជាប្រពន្ធប្រទះឃើញចង.កស្លាប់នៅក្នុងផ្ទះរបស់ខ្លួនបង្កឲ្យមានការភ្ញាក់ផ្អើលនៅវេលាម៉ោង៥ និង១៥នាទីទៀបភ្លឺ ថ្ងៃទី២១ ខែធ្នូ ឆ្នាំ២០១៥ ស្ថិតក្នុងភូមិថ្កុល ឃុំត្រើយស្លា ស្រុកស្អាង ខេត្តកណ្តាល ។
នាយប៉ុស្តិ៍នគរបាលរដ្ឋបាលត្រើយស្លាលោកអនុសេនីយ៍ទោ ពុយ ទ្រី បានឲ្យដឹងថា ជនរងគ្រោះឈ្មោះ ចេក ប្រាំង ភេទប្រុស អាយុ៥៧ឆ្នាំ មុខរបរជា កសិករ មានប្រពន្ធឈ្មោះ អ៊ីង សុខ អាយុ៥៥ឆ្នាំ មុខរបរជា កសិករ មានកូន៤នាក់ ស្រី៣នាក់ បច្ចុប្បន្នរស់នៅក្នុងភូមិថ្កុល ឃុំត្រើយស្លា ស្រុកស្អាង ។
លោកអនុសេនីយ៍ទោ ពុយ ទ្រី បានឲ្យដឹងថា នៅមុនពេលកើតហេតុជនរងគ្រោះបានក្រោកពីវេលាម៉ោងប្រមាណ៤ព្រឹកទៅអង្គុយផឹកតែនៅផ្ទះរបស់ខ្លួនជាមួយឈ្មោះ ថៃ គុណ ភេទប្រុស អាយុ៥៨ឆ្នាំ ដែលមានផ្ទះនៅជិត ។ ក្រោយពីផឹកតែអស់មួយប៉ាន់ជនរងគ្រោះបានដើរចូលទៅក្នុងផ្ទះបាត់ទៅ រីឯឈ្មោះ ថៃ គុណ ក៏បានទៅផ្ទះបាត់ដែរ ។ លុះដល់វេលាម៉ោង៥ និង១៥នាទីព្រឹកស្រាប់តែស្ត្រីជាប្រពន្ធបានប្រទះឃើញជនរងគ្រោះចង.ក នៅលើធ្នឹមរោងបាយស្លាប់បាត់បង់ជីវិតបង្កឲ្យមានការភ្ញាក់ផ្អើលឡើងតែម្តង ។
លោកនាយប៉ុស្តិ៍បានបន្តទៀតថា ជនរងគ្រោះបានចង.កធ្វើអត្តឃាតដោយប្រើប្រាស់ក្រម៉ាចងភ្ជាប់ជាមួយធ្នឹមរោងបាយ រួចឡើងជាន់លើកៅអីឈើ ខណៈដែលមិនមាននណានៅក្នុងផ្ទះបាយ ។ តាមការសន្និដ្ឋានជនរងគ្រោះមានវិបត្តិនៅក្នុងគ្រួសារ ទើបបានជាសម្រេចចិត្តចង.កធ្វើអត្តឃាតសម្លាប់ខ្លួនយ៉ាងដូច្នេះ ។
ក្រោយពីពិនិត្យរួចរាល់សមត្ថកិច្ចបានប្រគល់សាកសពជនរងគ្រោះទៅឲ្យក្រុមគ្រួសារយកទៅធ្វើបុណ្យតាមប្រពៃណី ។
ប្រជាពលរដ្ឋរស់នៅជិតខាងបានលើកឡើងថា នៅសល់តែរយៈពេលប្រមាណ២ខែទៀតប៉ុណ្ណោះកូនប្រុសជនរងគ្រោះនឹងដល់ថ្ងៃរៀបមង្គលការ មិនគួរណាបុរសជាឪពុកសម្រេចចិត្តគិតខ្លីយ៉ាងនេះសោះ ៕
ដោយ៖ ស្អាងជ័យ
