ខេត្តបន្ទាយមានជ័យ៖ នគរបាលខេត្តបន្ទាយមានជ័យ ក្នុងរយៈពេល៣ថ្ងៃចុងក្រោយនេះ គេសង្កេតឃើញបានពង្រឹងសន្តិសុខយ៉ាងម៉ឺងម៉ាត់ ជាពិសេសដាក់កម្លាំងពង្រាយតាមគោលដៅសំខាន់ៗ នៅក្នុងទីផ្សារដែលមានអាជីវករលក់មាស និងកន្លែង ដូរ វេរប្រាក់ដែលជាចំណុចប្រឈមសម្រាប់ក្រុមចោរប្លន់ធ្វើសកម្មភាព។
ការរិតបន្តឹងសន្តិសុខពីសំណាក់កងកម្លាំងនគរបាលខេត្តបន្ទាយមានជ័យ ក្រោយពីសម្តេចតេជោ ហ៊ុន សែន ប្រមុខរាជរដ្ឋាភិបាលកម្ពុជា បានដាក់តឿនឱ្យកងកម្លាំងគ្រប់ប្រភេទការពារសិន្តិសុខជូនប្រជាពលរដ្ឋឱ្យបានម៉ឺងម៉ាត់ ក្រោយពីមានអំពើប្លន់ប្រដាប់អាវុធយ៉ាងក្រើកមួយរយៈចុងក្រោយនេះនៅក្នុងរាជធានី និងតាមបណ្តាខេត្តក្រុងមួយចំនួននៅក្នុងប្រទេសកម្ពុជា។
បញ្ហាអំពើប្លន់នោះដែរសម្តេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃថ្មីៗនេះ ក៏ធ្លាប់មានប្រសាសន៍ព្រមានបកសក្តិ និងដកតំណែងលោកស្នងនគរបាលខេត្ត៣ខេត្ត បើសិនបង្ក្រាបចោរប្លន់មិនបានទេនោះ។
កងម្លាំងនគរបាលខេត្តបន្ទាយមានជ័យបានដាក់កម្លាំងពង្រាយការពារតាមគោលដៅសំខាន់ខាងលើត្រូវគេនិយាយថា ក្រោមការដាក់ចេញនូវវិធានការបង្ការទប់ស្កាត់អំពើលួចឆក់ប្លន់តាមបទបញ្ជារបស់លោកឧត្តមសេនីយ៍ទោ អាត់ ខែម ស្នងការនគរបាលខេត្ត ។ តាមរយៈនៃការអនុវត្តបទបញ្ជាលោកឧត្តមសេនីយ៍ស្នងនគរបាលខេត្ត គេសង្កេតឃើញកងកម្លាំងបានការពារយ៉ាងប្រុងប្រយ័ត្នប្រកបដោយស្មារតីទទួលខុសត្រូខ្ពស់ ប្រដាប់ដោយអាវុធវែងខ្លី ជាប់ដៃដោយ ប្រើប្រាស់កម្លាំងល្បាតតាមរថយន្ត និងម៉ូតូនិងដាក់យាមកាមរាយតាមគោលដៅគ្រប់ច្រកល្ហកសំខាន់ៗចេញចូល។
ការដាក់ការពារពង្រឹងសន្តិសុខសមត្ថកិច្ចធ្វើឡើងនៅក្នុងទីប្រជុំជនសំខាន់ៗនៅក្រុងប៉ោយប៉ោយប៉េត និងក្រុងសិរីសោភ័ណ ដែលមានមនុស្សកកកុញហើយនៅតាមបណ្តាស្រុកមួយចំនួនទៀតក៏អនុវត្តការងារពង្រឹងសន្តិសុខដូចគ្នាផងដែរ។
សូមបញ្ជាក់ថានៅខេត្តបន្ទាយមានជ័យក្រោយពីមានការរិតបន្តឹងសន្តិសុខពីសំណាក់កងកម្លាំងនគរបាលខេត្តបន្ទាយមានជ័យគេសង្កេតឃើញថាប្រជាពលរដ្ឋមានភាពកក់ក្តៅ និង មានអាម្មណ៍សប្បាយរីករាយនូវការយកចិត្តទុកដាក់នៃការរក្សាសន្តិសុខបង្ការទប់ស្កាត់បទល្មើសលួចឆក់ប្លន់នៅពេលនេះ ។ ខេត្តបន្ទាយមានជ័យទោះបីមិនទាន់កើតមានអំពើប្លន់ប្រដាប់អាវុធក៏ដោយ ក៏ប៉ុន្តែវិធានការបង្ការទប់ស្កាត់ត្រូវបានរិតបន្តឹងនិងធ្វើឡើងជាប្រចាំ ៕
ដោយ៖ សំ វិច្ឆិកា
