ភ្នំពេញ ៖​ បុរសម្នាក់បានឆ្លើយសារភាពថា​ខ្លួនពិតជាបានធ្វើសកម្មភាពកាច់កម៉ូតូរបស់ប្រជាពលរដ្ឋចតទុកចោល ​ ដោយអះអាងថា ជីវភាពខ្វះខាត​ ជាពិសេសអត់លុយបង់ថ្លៃសាលាកូន ទើបសម្រេចចិត្តធ្វើសកម្មភាពបែបនេះតែម្តងទៅ។

    លោកវរសេនីយ៍​ឯក​ ជឹម​ សុីថា​ អធិការខណ្ឌដង្កោបានអោយដឹងថា​នៅវេលាព្រឹកថ្ងៃទី០៥​ ខែ​ កក្កដា​ ឆ្នាំ២០១៩​  ជនសង្ស័យឈ្មោះ​ សុខ​ ឆេង​ ភេទប្រុស​ អាយុ៤៥ឆ្នាំ​ មុខរត់កង់បី​ មានស្រុកកំណើត​ ភូមិឈ្លោង​ ឃុំឈ្លោង​ស្រុកឈ្លោង​ ខេត្តក្រចេះ​ បានធ្វើសកម្មភាពកាច់កម៉ូតូមួយគ្រឿងម៉ាកសេ១២៥​ ពណ៌ខ្មៅ​ ពាក់ស្លាកលេខភ្នំពេញ​ 1HQ 2952​ ដែលជនរងគ្រោះចតទុកនៅមុខផ្ទះ​ ស្ថិតនៅសង្កាត់ទៀន​ ខណ្ឌដង្កោ​ បានសម្រេចហើយព្យាយាមជិះគេចខ្លួន​ តែត្រូវកម្លាំងលោកដែលកំពុងជិះល្បាតតាមមូលដ្ឋានឃើញក៏ដេញតាមចាប់រហូតមកដល់ចំណុចច្រមុះជ្រូកវត្តហា​ ផ្លូវ៥០ម៉ែត្រ​ សង្កាត់ដង្កោ​ ខណ្ឌដង្កោ​ ក៏កម្លាំងរបស់លោកធាក់ផ្តួលចាប់បានជនសង្ស័យភ្លាមៗតែម្តង​ ។

លោកបន្តថាក្រោយចាប់ជនសង្ស័យបានភ្លាមនោះកម្លាំងសមត្ថកិច្ចបានដឹកជនសង្ស័យរួមទាំងវត្ថុតាងនឹងម៉ូតូរបស់ជនរងគ្រោះយកកាន់អធិការដ្ឋាននគរបាលខណ្ឌដង្កោ​ ដើម្បីធ្វើការសាកសួរនឹងកសាងសំណុំរឿងបញ្ជូនទៅតុលាការចាត់ការតាមនីតិវិធីច្បាប់ ៕ ដោយ ៖ ភារ៉ា ដង្កោ