ពេលមិនពេញចិត្តអ្វីក៏ខុស ពេលទំនាក់ទំនងល្អ ធ្វើអ្វីក៏ត្រូវតែ ហើយថែមទាំងជួយការពារទៀតផង ។ នៅថ្ងៃទី២ខែសីហានេះកូរ៉េខាងជើង បន្តបាញ់សាកល្បងមីស៊ីលជាលើកទី២ ក្នុងរយៈពេលមួយសប្តាហ៍ ធ្វើឲ្យប្រទេសជិតខាង បារម្ភយ៉ាងខ្លាំង ។
ចំណែកអាមេរិកវិញប្រធានាធិបតី ដូណាល់ ត្រាំ បានប្រកាសថា កាំជ្រួចមីស៊ីលដែលកូរ៉េខាងជើង បានសាកល្បង ជាប្រភេទ ខ្លី មិនប៉ះពាល់ដល់ គម្រោងពិភាក្សានោះឡើយ។
សារព័ត៌មានយ៉ុនហាប់ ដកស្រង់ពីមន្ត្រីយោធា ហើយចេញផ្សាយ នៅថ្ងៃទី២ ខែសីហា ឆ្នាំ២០១៩នេះថា កូរ៉េខាងជើង បានបាញ់មីស៊ីល រយៈចម្ងាយខ្លី បន្ថែមទៀត កាលពីវេលាម៉ោង២ និង៥៩នាទី រំលងអធ្រាត្រ និងម៉ោង៣ និង២៣នាទី (ម៉ោងនៅក្នុងតំបន់) ឈានចូលថ្ងៃទី២ ខែសីហា ឆ្នាំ២០១៩ ដោយបាញ់ចេញពីតំបន់ Yonghung ខេត្ត South Hamgyong ប្រទេសកូរ៉េខាងជើង ។
សេចក្តីថ្លែងការណ៍មួយពីនាយអគ្គសេនាធិការរួមកូរ៉េខាងត្បូង បានបញ្ជាក់ថា មន្ត្រីយោធារបស់ខ្លួន បានដឹងអំពីរឿងនេះដែរ ហើយបាននិងកំពុងត្រួតពិនិត្យមើល ស្ថានការណ៍នានា ជុំវិញបញ្ហានេះ។
សារព័ត៌មានយ៉ុនហាប់ បានផ្សាយភ្លាមៗ បន្ទាប់ពីក្រុមចារកម្មអាមេរិក រាយការណ៍មក ដោយបានបង្ហាញថា កូរ៉េខាងជើងបានបាញ់មីស៊ីល ហាក់ដូចជាមីស៊ីលដែលបាញ់ កាលពីសប្តាហ៍មុនដូច្នោះដែរ។ ទោះជាបែបណា មន្ត្រីយោធាអាមេរិក នៅមិនទាន់បានបញ្ជាក់ច្បាស់ថា មីស៊ីលប៉ុន្មាន គ្រាប់ដែលត្រូវកូរ៉េខាងជើងបានបាញ់នោះទេ ហើយថាមីស៊ីលនោះ មិនគំរាមកំហែងដល់ភាគខាងជើង នៃអាមេរិកឡើយ។
ក្រោយព័ត៌មានអំពីសាកល្បងមីស៊ីលនេះ បែកធ្លាយមក លោកប្រធានាធិបតីអាមេរិក ដូណាល់ ត្រាំ បានថ្លែងប្រាប់អ្នកកាសែតថា លោកមិនបានព្រួយបារម្ភ ចំពោះមីស៊ីលនោះទេ ដោយលោកបានកត់សម្គាល់ថា មីស៊ីលទាំងនោះ មានរយៈចម្ងាយខ្លី។ លោក ត្រាំ បានថ្លែងថា «មីស៊ីលរយៈចម្ងាយរបស់ខ្លួន យើងមិនដែលពិភាក្សាអំពីវានោះទេ យើងផ្តោតតែទៅលើអាវុធនុយក្លេអ៊ែរប៉ុណ្ណោះ»៕
