ខេត្ដកំពង់ចាម៖ ប្រជាពលរដ្ឋនៅឃុំ រាយប៉ាយ ស្រុកកងមាស ខេត្ដកំពង់ចាម បារម្ភពីរឿងខ្វះទឹកដាក់ស្រែនៅពេលខាងមុខ ។ ក្ដីបារម្ភនេះក្រោយពេលតំបន់ ប្រភពទឹកដែលអ្នកភូមិភាគច្រើនខំទប់ ទំនប់រក្សាទឹកទុកសម្រាប់ដាក់ស្រែនោះ ត្រូវពលរដ្ឋមួយចំនួនតូចទៅកាប់ទំនប់ ដើម្បីបង្ហូរទឹកចេញទៅវិញ ។ ចំពោះបញ្ហា នេះលោកមេឃុំរាយប៉ាយបញ្ជាក់ថា លោកនឹងចាត់វិធានការនៅសបា្ដហ៍ ក្រោយ ។
ប្រជាពលរដ្ឋនៅឃុំរាយប៉ាយដែល មានស្រូវស្រែប្រាំងស្ថិតនៅក្រៅតំបន់ មេទឹក ឬ ក្រៅប្រភពទឹកបឹងបាក់អង្រុត បានសម្រេចដាក់ពាក្យប្ដឹងទៅអាជ្ញាធរឃុំ ដើម្បីស្នើឱ្យជួយដោះស្រាយបញ្ហាទឹក របស់ពួកគាត់ ។ ការស្នើសុំរបស់ប្រជា ពលរដ្ឋប្រមាណ១០នាក់តំណាងឱ្យពល រដ្ឋជិត១០០គ្រួសារនោះនៅពុំទាន់មាន ដំណោះស្រាយនៅឡើយទេ ។
ពលរដ្ឋសុំមិនឱ្យបញ្ចេញឈ្មោះម្នាក់និយាយថា សកម្មភាពបង្ហូរទឹកចេញពី តំបន់មេទឹកគឺកើតឡើងប្រមាណជិត១០ ថ្ងៃមកហើយ ។ លោកបន្ដថា តំបន់នោះ ប្រជាពលរដ្ឋប្រមាណ៨០គ្រួសារខំប្រឹង រៃអង្គាសប្រាក់គ្នាសម្រាប់ធ្វើទំនប់ កាល ពីទឹកមិនទាន់ឡើងដើម្បីរក្សាទុកទឹកធ្វើ ស្រែប្រាំង ប៉ុន្ដែនៅពេលទឹកចាប់ផ្ដើម ស្រកបែរជាមានអ្នកទៅកាប់ទំនប់បង្ហូរទឹកចោលទៅវិញ ។ ប្រភពដដែលបន្ដ ថា ការបង្ហូរទឹកចោលនេះគឺធ្វើឱ្យ ប៉ះពាល់ដល់ប្រជាពលរដ្ឋជិត១០០គ្រួសារ ដែលមានដីស្រែនៅផ្នែកខាងលើប្រភពទឹកជួបនឹងគ្រោះមហន្ដរាយ ពីព្រោះស្រូវ របស់ពួកគាត់ខ្លះទើបមូលដើមសន្ទូងខ្លះ ទើបចាប់ផ្ដើមផើម រីឯទឹកបឹងវិញគឺ គេបង្ហូរជិតអស់ទៅហើយ ។
ពលរដ្ឋមួយរូបទៀតបញ្ជាក់ថា ពួក គាត់បានដាក់លិខិតទៅអាជ្ញាធរឃុំឱ្យជួយដោះស្រាយប៉ុន្ដែមិនទាន់មានលទ្ធផលល្អទេ ។ លោកថា ពលរដ្ឋភាគច្រើនអាច ត្រូវរងគ្រោះដោយសារខ្វះទឹកដាក់ស្រូវ ប្រសិនបើអាជ្ញាធរមិនជួយទប់ស្កាត់ ហើយលោកក៏មិនចង់ឱ្យទង្វើនេះកើត មាននៅពេលក្រោយៗទៀតដែរ ។
ទាក់ទិននឹងបញ្ហានេះលោកមេឃុំរាយប៉ាយ លោក ហេង ហ៊ាប មានប្រសាសន៍ ថាអាជ្ញាធរឃុំចុះពិនិត្យមើលភាពជាក់ ស្ដែងម្ដងរួចមកហើយគឺឃើញថាទំនប់បឹងបាក់អង្រុតដែលប្រជាពលរដ្ឋខំទប់ កាលពីពេលកន្លងទៅត្រូវបានគេទម្លាយដើម្បីបង្ហូរទឹកចេញប្រាកដមែន ។ លោក ថា អាជ្ញាធរឃុំរវល់ការងារមួយចំនួន ទើបមិនទាន់បានដោះស្រាយបញ្ហានេះ ។ ទោះជាយ៉ាងណាលោកក៏បានប្រាប់ពល រដ្ឋឱ្យនាំគ្នាទប់ទំនប់នោះឡើងវិញទម្រាំអាជ្ញាធរកោះហៅប្រជាពលរដ្ឋដែល មានដីស្រែនៅក្នុងតំបន់មេទឹកមកធ្វើ កិច្ចសន្យាដើម្បីបញ្ឈប់សកម្មភាពបង្ហូរ ទឹកចេញពីតំបន់មេទឹក និងមិនឱ្យមាន សកម្មភាពនេះកើតឡើងបន្ដទៀតឡើយ ។
លោកមេឃុំបន្ថែមថា បើទោះបី ជាមានការបង្ហូរទឹកចេញពីតំបន់ប្រភពទឹកខ្លះក៏ដោយ ប៉ុន្ដែវាមិនអាចបង្កឱ្យ ពលរដ្ឋមានស្រូវស្រែនៅផ្នែកខាងលើ ប្រភពទឹកទាំងនោះ ខ្វះទឹកដាក់ស្រែទេ គឺគ្រាន់តែពួកគាត់ត្រូវពិបាកយកទឹក ពីកន្លែងឆ្ងាយពីស្រែរបស់ខ្លួនប៉ុណ្ណោះ ។ លោកបញ្ជាក់ថា តាមពិតដីដែលមាន នៅក្នុងតំបន់មេទឹកទាំងអស់មិនអាច ក្លាយជាសម្បត្ដិផ្ទាល់ខ្លួនឬជាដីឯកជន របស់បុគ្គលណាបានទេ ពីព្រោះវាដីបឹង ឬជាដីស្ថិតនៅក្នុងដែនសមត្ថកិច្ចគ្រប់ គ្រងរបស់រដ្ឋបាលជលផល ។
គួរបញ្ជាក់ថា កាលពីថ្ងៃទី ២៣ ធ្នូ រាជរដ្ឋាភិបាលបានចេញសារាចរណែនាំស្ដីពីវិធានការថែរក្សាទឹកទុកសម្រាប់ ប្រើប្រាស់ ។ ក្នុងសារាចរឱ្យដឹងថា នៅ ឆ្នាំ២០១៦ខាងមុខប្រទេសកម្ពុជានឹងទទួលឥទ្ធិពលបាតុភូតអេលនីណូ (El Nino) ឬបាតុ ភូតក្ដៅរហូតដល់ចុងខែមិថុនា ។ បាតុភូតនេះធ្វើឱ្យរដូវវស្សាមកដល់យឺតហើយនៅដើមរដូវវស្សាមានភ្លៀងធ្លាក់តិចតួចហើយមានអាកាសធាតុក្ដៅហួតហែងជាដើម ហើយស្ថានភាពអាកាស ធាតុបែបនេះនឹងកើតឡើងចាប់ខែកុម្ភៈដល់ចុងខែមិថុនា ។ បញ្ហានេះនឹងធ្វើឱ្យ ខ្វះទឹកប្រើប្រាស់នៅតំបន់មួយចំនួនរហូតដល់ពាក់កណ្ដាលខែកក្កដាឆ្នាំ២០១៦ ។
រាជរដ្ឋាភិបាលក៏បានណែនាំឱ្យកសិករ គឺអាចធ្វើស្រូវប្រាំងបានតែមួយដង ប៉ុណ្ណោះដោយត្រូវរក្សាទឹកទុកសម្រាប់ ប្រើប្រាស់ប្រចាំថ្ងៃនិងដាំដំណាំផ្សេងទៀតក្រៅពីស្រូវ ។ លើសពីនេះទៀតអាជ្ញាធរ គ្រប់ជាន់ថ្នាក់ត្រូវចូលរួមថែរក្សាទឹកទុកឱ្យបានល្អសម្រាប់ប្រើប្រាស់ប្រចាំថ្ងៃតែប៉ុណ្ណោះរហូតដល់មានភ្លៀងធ្លាក់ឡើង វិញ ៕
ដោយ៖ ហេង នរិន្ទ្រ
