ខេត្តស្វាយរៀង ៖ យ៉ាងហោចណាស់មនុស្ស២នាក់បានស្លាប់ និងម្នាក់ទៀតរងរបួសធ្ងន់ដោយសារជួបគ្រោះថ្នាក់ចរាចរណ៍ រវាងម៉ូតូធំបុកគ្នាជាមួយរថយន្តដឹកដី ដែលធ្វើដំណើរបញ្ច្រាសទិសគ្នា កាលពីវេលាម៉ោង១១​និង​៤០នាទីព្រឹក ថ្ងៃទី២៧ ខែសីហា ឆ្នាំ២០១៩ នៅលើផ្លូវជាតិលេខ១ ស្ថិតក្នុងភូមិជ្រៃធំ សង្កាត់ព្រៃអង្គុញ ក្រុងបាវិត ខេត្តស្វាយរៀង។

យោងតាមសមត្ថកិច្ចនគរបាលក្រុងបាវិតបានឲ្យដឹងថា បើកបរម៉ូតូមានឈ្មោះ ស៊ុ ប៊ី អាយុ២៦ឆ្នាំ ជនជាតិខ្មែរ មុខរបរជាងសំណង់ រស់នៅភូមិក្រសាំង ឃុំធ្មា ស្រុករំដួល ខេត្តស្វាយរៀង (របួសធ្ងន់) រួមដំណើរ២នាក់ឈ្មោះ ទេព ធា (ស្លាប់) ភេទប្រុស អាយុ៣០ឆ្នាំ ជនជាតិខ្មែរ មុខរបរធ្វើស្រែ មានទីលំនៅភូមិក្រសាំង ឃុំធ្មា ស្រុករំដួល ខេត្តស្វាយរៀង និងឈ្មោះស៊ុ សុប៉ាវ (ស្លាប់) ភេទប្រុស អាយុ០៦ឆ្នាំ ជនជាតិខ្មែរ មុខរបរសិស្ស មានទីលំនៅភូមិច្រកឬស្សី សង្កាត់បាទី ក្រុងបាវិត ខេត្តស្វាយរៀង។

ប្រភពបន្តថា នៅមុនពេលកើតហេតុគេឃើញមានម៉ូតូធំមួយគ្រឿងម៉ាក Honda AX1 ពណ៌ស ពាក់ស្លាក​លេខ ភ្នំពេញ 1BC -8763 ជិះគ្នា៣នាក់ ធ្វើដំណើរពីកើតទៅលិច លុះមកដល់ចំណុចកើតហេតុខាងលើបានជែងរថយន្តកុងតឺន័រមួយគ្រឿង ដែលធ្វើដំណើរស្របទិសគ្នា ជ្រុលទៅបុករថយន្តដឹកជីមួយគ្រឿងម៉ាកហ៊ីយ៉ាន់ដាយ ពណ៌ស ពាក់ស្លាកលេខភ្នំពេញ3B-3439 បើកបរដោយបុរសម្នាក់ដោយមិនស្គាល់អត្តសញ្ញាណ ដែលធ្វើដំណើរបញ្ច្រាសទិសគ្នា បណ្តាលឲ្យមានមនុស្សពីនាក់ស្លាប់ភ្លាមៗនៅកន្លែងនិងម្នាក់ទៀតរងរបួសធ្ងន់ ត្រូវបានសមត្ថកិច្ចហៅរថយន្តសង្គ្រោះបន្ទាន់ ដឹកយកទៅកាន់មន្ទីរពេទ្យខេត្តស្វាយរៀង។

សាកសពទាំងពីរត្រូវបានប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី ចំណែកជនរងគ្រោះម្នាក់ទៀត កំពុងសម្រាកព្យាបាលនៅមន្ទីរពេទ្យបង្អែកស្វាយរៀង ។

ក្រោយវាស់វែងនិងធ្វើកំណត់ហេតុរួច មធ្យោបាយធ្វើដំណើរទាំងពីរគ្រឿង សមត្ថកិច្ចបានស្ទូចនាំយកមកទៅរក្សាទុកនៅប៉ុស្តិ៍រដ្ឋបាលព្រៃអង្គុញ ដើម្បីបំពេញសំណុំរឿងតាមច្បាប់ ៕ សុថាន