ខេត្តស្វាយរៀង៖ មនុស្សប្រុស៤នាក់ស្លាប់ និងរងរបួសធ្ងន់ដោយសារករណីគ្រោះថ្នាក់ចរាចរណ៏រវាងម៉ូតូ៣គ្រឿងបុកគ្នាលាន់សូដូចរន្ទះបាញ់ខែចែត្រកាលពីវេលាម៉ោង៩យប់ថ្ងៃទី២៧ ខែធ្នូ ឆ្នាំ២០១៥លើផ្លូវជាតិលេខ៣១៤ ក្នុងភូមិតាណ៏រ សង្កាត់ស្វាយតឿ ក្រុងស្វាយរៀង ។

យោងតាមសមត្ថកិច្ចនគបាលខេត្តស្វាយរៀងបានអោយដឹងថាមុនពេលកើតហេតុមាន ម៉ូតូម៉ាកហុងដាវេវ ពណ៌ក្រហមអត់ស្លាកលេខ បើកបរដោយឈ្មោះចាន់ នី ភេទប្រុស អាយុ២២ឆ្នាំមុខរបរកម្មករមានទីលំនៅភូមិថ្មី សង្កាត់សង្ឃ័រ ក្រុងស្វាយរៀង ធ្វើដំណើរពីកើតមកលិចស្របពេលនោះក៏មានម៉ូតូមួយគ្រឿងម៉ាកហុងដា សេ១២៥ ពណ៍ខ្មៅពាក់ស្លាកលេខស្វាយរៀង1A-6088បើកបរដោយឈ្មោះឡឹង ចិន្តា ភេទប្រុស អាយុ២៥ឆ្នាំមុខរបរកម្មករ រស់នៅភូមិថ្មី សង្កាត់សង្ឃ័រ ក្រុងស្វាយរៀង និងអ្នករួមដំណើរឈ្មោះ ភាគ មុន្នីស្រស់ ភេទប្រុស អាយុ២៤ឆ្នាំនៅភូមិចំបក់ពាម សង្កាត់សង្ឃ័រ ក្រុងស្វាយរៀង ធ្វើដំណើរបញ្ច្រាសទិសគ្នាពីលិចមកកើតក៏បុកយ៉ាងពេញទំហឹងលាន់សូរដូចរន្ទះបណ្ដាលអោយដួលរណូករណែកពេញផ្លូវតែម្ដង ។

ប្រភពបន្តថា ប៉ុន្តែអ្វីដែរគួរអោយរន្ធត់នោះក្រោយកើតហេតុស្រាប់តែមានម៉ូតូមួយគ្រឿងទៀតម៉ាកហុងដាសេC125ពណ៏ខ្មៅពាក់ស្លាកលេខស្វាយរៀង1G-9875បើកបរដោយឈ្មោះ ប្រាក់ កក្កដា អាយុ២៤ឆ្នាំ ភេទប្រុស មុខរបរកម្មកររស់នៅភូមិថ្មី សង្កាត់សង្ឃ័រ ក្រុងស្វាយរៀងទិសដៅពីលិចមកកើតចាប់ហ្វ្រាំងមិនទាន់ក៏បុកបន្ថែមទៀត ។ រិឯអ្នកបើកម៉ូតូហុងដា សេ១២៥ ពណ៍ខ្មៅ ពាក់ស្លាកលេខស្វាយរៀង1A-6088 បើកបរដោយឈ្មោះឡឹង ចិន្តាដោយរងរបួសធ្ងន់ធ្ងរពេកក៏បានស្លាប់ក្នុងមន្ទីរពេទ្យចំពោះ៣នាក់ទៀតរងរបួសធ្ងន់កំពុងសំរាកព្យាបាលនៅមន្ទីរពេទ្យបង្អែកខេត្តស្វាយរៀង។ សពត្រូវបានសមត្ថកិច្ចប្រគល់ទៅអោយក្រុមគ្រួសារយកធ្វើបុណ្យតាមប្រពៃណី ។

ចំពោះម៉ូតូទាំង៣គ្រឿងត្រូវបានសមត្ថកិច្ចនគរបាលអូសមកកាន់អធិការដ្ឋាននគរបាលក្រុងស្វាយរៀងដោះស្រាយបន្តតាមច្បាប់ និងធ្វើការស្រាវជ្រាវថាភាគីខាងណាអ្នកបង្កគ្រោះថ្នាក់ចរាចរណ៏នេះកើតឡើង ៕

ដោយ៖ យឹម សុថាន