គ្រោះថ្នាក់យន្តហោះដឹកអ្នកដំណើររបស់ក្រុមហ៊ុនអាកាសចរណ៍ ២ផ្សេងគ្នាសម្លាប់មនុស្សជាង៣០០នាក់ ហើយគ្រោះថ្នាក់កើតឡើងដោយសារទេកំហុសរបស់យន្តហោះ 737 MAX ផលិតដោយក្រុមហ៊ុន ប៊ូអ៊ីង។ក្រុមហ៊ុនប៊ូអ៊ីង កាលពី២៣ កញ្ញាបានប្រកាសសងសំណងចំនួន ១៤៤.៥០០ដុល្លារក្នុងម្នាក់ៗ ដល់ក្រុមគ្រួសារជនរងគ្រោះដែលបានបាត់បង់ជីវិតដោយសារហេតុការណ៍ ធ្លាក់យន្តហោះ 737 MAX ទាំងពីរលើក ។ ជនរងគ្រោះចំនួន៣៤៦នាក់ បានបាត់បង់ជីវិតដោយសារគ្រោះថ្នាក់នេះ ។
មូលនិធីនេះ ស្ថិតក្រោមការត្រួតពិនិត្យដោយក្រុមមេធាវីនៅវ៉ាស៊ីនតោនរបស់លោក Ken Feinberg និង Camille S. Biros ។ គម្រោងនេះបានប្រកាសកាលពីខែកក្កដា ឆ្នាំ២០១៩ ហើយចាប់ផ្តើមទទួលយកការទាមទារស្នើសុំពីក្រុមគ្រួសារជនរងគ្រោះចាប់ពីពេលឥឡូវនេះទៅ ។
ក្រុមគ្រួសារជនរងគ្រោះទាំងអស់ ក៏មិនតម្រូវឲ្យទម្លាក់ចោកការប្តឹងផ្តល់អ្វីនោះទេក្នុងលក្ខខណ្ឌទទួលបានសំណងខាងលើនេះ ។ យន្តហោះ 737 MAX ឈប់ដំណើរការហោះហើរតាំងតែពីខែមីនា ឆ្នាំ២០១៩មកម្ល៉េះ គឺក្រោយពីយន្តហោះប្រភេទនេះបានធ្លាក់ស្លាប់មនុស្សរាប់រយនាក់នៅក្នុងប្រទេសអេត្យូពីនិងឥណ្ឌូនេស៊ី ។
នាយកប្រតិបត្តិក្រុមហ៊ុនប៊ូអ៊ីងលោក Dennis Muilenburgបានថ្លែងនៅក្នុងសេចក្តីថ្លែងការណ៍មួយថា «យើងនៅតែបន្តបង្ហាញការអាណិតអាសូរយ៉ាងជ្រាលជ្រៅដល់ក្រុមគ្រួសារនិងសាច់ញាតិជាទីស្រឡាញ់របស់ពួកគេដែលស្ថិតនៅលើយន្តហោះជួបគ្រោះថ្នាក់ ។ ការបើកមូលនិធិនេះគឺជាជំហានដ៏សំខាន់មួយនៅក្នុងកិច្ចខិតខំប្រឹងប្រែងរបស់យើងដើម្បីជួយដល់គ្រួសារដែលរងផលប៉ះពាល់»។
ក្រុមហ៊ុនបូអ៊ីងកាលពីនៅក្នុងខែកក្កដា ឆ្នាំ២០១៩បានប្រកាសថាខ្លួនមានផែនការចំណាយប្រាក់បន្ថែម៥០លានដុល្លារ ដើម្បីគាំទ្រដល់ការអប់រំនិងការពង្រឹងសេដ្ឋ កិច្ចដល់សហគមន៍ទាំងឡាយដែលទទួលរងផលប៉ះពាល់ ។
ការទាមទារប្រាក់សំណងពីក្រុមគ្រួសារជនរងគ្រោះ ត្រូវតែមានការបញ្ជាក់ថា មិនហួសពីថ្ងៃទី៣០ ខែវិច្ឆិកា ឆ្នាំ២០១៩នោះឡើយ ។ ការទាមទារសំណងដែលមានលក្ខណៈគ្រប់គ្រាន់ នឹងត្រូវផ្តល់ជូនទឹកប្រាក់គ្រប់ចំនួនក្នុងរយៈពេលដប់ថ្ងៃ ចាប់ពីថ្ងៃដែលពាក្យស្នើសុំរបស់ក្រុមគ្រួសារជនរងគ្រោះបានដាក់ស្នើសុំ និងមានលក្ខណៈសម្បត្តិគ្រប់គ្រាន់ដើម្បីទទួលបានប្រាក់សំណងនេះ ៕
