ខេត្តត្បូងឃ្មុំ ៖ ប្រជា នេសាទបានឱ្យដឹងថា ក្នុងដែនទឹកនេសាទស្រុកក្រូច ឆ្មារ ខេត្តត្បូងឃ្មុំ កំពុងកើត មាននូវបទល្មើសនេសាទ ដោយការប្រើប្រាស់នូវឧបករណ៍ខុសច្បាប់ច្រើនប្រភេទ ដែលទាម ទារឱ្យមន្ត្រីជំនាញចាត់វិធានការបន្ទាន់ ដើម្បីទប់ ស្កាត់បញ្ហា នៃបទល្មើស នេសាទនេះ។
ពលរដ្ឋថា បន្ទាប់ពីទឹកជំនន់ជន់លិចពាសពេញព្រែក បឹងបួ ទន្លេ ដែលនេះ ជាអំណោយផលដល់ការធ្វើចរាចរណ៍របស់ត្រីនោះ វាក៏ជាពេលវេលាល្អសម្រាប់អ្នកប្រព្រឹត្តបទ ល្មើសនេសាទដែរ ដែលអ្នកប្រព្រឹត្តបទ ល្មើស បានប្រើប្រាស់បច្ចេកវិទ្យាទំនើបថ្មី ដែលមានឧបករណ៍ឆក់ ឧបករណ៍បំពុល សំណាញ់ញឹក ទូកធំៗ អូសកាត់ទន្លេ ដើម្បី ចាប់ត្រី ដែលនេះជាការបំផ្លាញត្រីគ្រប់ ប្រភេទ មិនថាឡើយត្រីតូច ធំ គឺត្រូវវិនាសហិនហោចស្ទើរគ្មានសល់។ នេះបើតាមការឱ្យដឹងពីប្រជានេសាទ ក្នុងស្រុកក្រូចឆ្មារ ខេត្តត្បូងឃ្មុំ។
ប្រជានេសាទ បានបញ្ជាក់ថា នៅក្នុងដែនទឹកស្រុកក្រូចឆ្មារ ខេត្តត្បូងឃ្មុំ ដែលជាអតីតឡូត៍នេសាទធំមួយ ក្នុងចំណោមឡូត៍នេសាទធំៗ ក្នុងប្រទេសកម្ពុជា ដែលត្រូវបានរាជរដ្ឋាភិបាល ប្រកាសរំលាយ ចោល ដើម្បីទុកជូនប្រជាពលរដ្ឋគ្រប់ ស្រទាប់វណ្ណៈ ប្រកបរបរនេសាទស្រប ច្បាប់ ដើម្បីជីវភាពនោះ តែពេលនេះ ត្រូវបានប្រមូលផ្ដុំដោយការនេសាទខុសច្បាប់ ដែលបានកើតឡើងដោយសារតែមានការឃុបឃិតគ្នាលក្ខណៈជាប្រព័ន្ធ ដែលទង្វើ នេះ នឹងធ្វើឱ្យអន្តរាយដល់ប្រភពមច្ឆជាតិ។
ប្រជានេសាទ ដែលប្រកបរបរនេសាទស្របច្បាប់តាមដងទន្លេ បានត្អូញត្អែរថា បន្ទាប់ពីការប្រកាសរំលាយឡូត៍នេសាទដំបូង ផលត្រីសម្បូរហូរហៀរដល់ពួកគេ ដែលគ្រាន់តែរាយមង បង់សំណាញ់ ចង សន្ទូច ក៏អាចចាប់ត្រីបានគ្រាន់បើដែរ តែពេលនេះ កុំថាឡើយត្រីសម្រាប់លក់ដូរខ្លះ សូម្បីតែសម្រាប់ស្ល ក៏សឹងរកមិនបានផង។
លោក យ៉ុង តាំងរី ប្រធានរដ្ឋបាលជលផលត្បូងឃ្មុំ បានឱ្យដឹងថា ការបង្ក្រាបបទល្មើសនេសាទ គឺកម្លាំងរបស់លោក តែងតែធ្វើជាប្រចាំដែរ តែនៅតែមានចន្លោះប្រហោង ដោយសារអ្នកប្រព្រឹត្តបទល្មើស នៅតែលបលួចនេសាទខុសច្បាប់ ដោយសារកម្លាំងរបស់លោកមិនគ្រប់គ្រាន់ មិនអាចធ្វើការងារនេះ បានគ្រប់ពេលវេលានោះទេ។
ក្រុមអ្នកប្រព្រឹត្តបទល្មើសនេសាទបានអះអាងថា ពួកគេអាចនេសាទដោយប្រើប្រាស់ឧបករណ៍ខុសច្បាប់បាន ក៏ ដោយសារតែមានការបើកភ្លើងខៀវពីមន្ត្រីជំនាញដែរ ៕ ដោយ ៖ វណ្ណៈ
