ភ្នំពេញ៖នៅព្រឹកថ្ងៃទី២៤ ខែតុលា នេះ លោក ណុប ផា អភិបាលរងខណ្ឌច្បារអំពៅ តំណាងអោយលោក ចេង មុនីរ៉ា អភិបាលខណ្ឌច្បារអំពៅ បានអញ្ជើញបើកការដ្ឋានជួសជុលផ្លូវបេតុងគ្មានសរសៃដែកនៅភូមិតាព្រហ្ម ភូមិទួលតាចាន់ សង្កាត់ព្រែកឯង ខណ្ឌច្បារអំពៅ មានប្រវែង៦០៧ម៉ែត្រ ទទឹង៥ម៉ែត្រ និង ប្រវែង២២២ម៉ែត្រ ទទឹង៤ម៉ែត្រ កម្រាស់០,១៥ម៉ែត្រ។
ក្នុងកម្មពិធីនេះដែរមានការចូលរួមពីលោកអភិបាលរងខណ្ឌ , លោក ញាណ ច័ន្ទសោភា នាយករដ្ឋបាលសាលាខណ្ឌ លោកចៅសង្កាត់ និង បងប្អូនប្រជាពលរដ្ឋជាច្រើននាក់ផងដែរ ។ លោក ណុប ផា អភិបាលរងខណ្ឌច្បារអំពៅ បានថ្លែងថា នៅថ្ងៃនេះលោកមានការរីករាយក្រៃលែងចំពោះគណៈអភិបាលខណ្ឌ ព្រមទាំងចៅសង្កាត់ ក្រុមប្រឹក្សាសង្កាត់ ព្រមទាំងប្រជាពលរដ្ឋរបស់យើងដែលថ្ងៃនេះ យើងទទួលបាននូវសមិទ្ធិផលថ្មីមួយទៀត ដែលអោយបងប្អូនប្រជាពលរដ្ឋនៅក្នុងមូលដ្ឋានរបស់យើងបានប្រើប្រាស់ជាប្រយោជន៍ សាធារណៈដែលជាផ្លូវបេតុងក្នុងការបើកកាដ្ឋាននៅព្រឹកនេះ។
លោក អះអាងថា នៅសង្កាត់ព្រែកឯងមិនមែនមានតែផ្លូវមួយខ្សែនេះទេ គឺយើងបានស្ថាបនាផ្លូវជាច្រើនខ្សែហើយយើងបានទទួលសមិទ្ធិផលដូចជានៅភូមិចុងព្រែក១ បានទទួលសមិទ្ធិផលពីសាលារាជធានីភ្នំពេញជូនចំនួន៤ខ្សែ ហើយកំពុងតែស្ថាបនា យើងគិតថាការអភិវឌ្ឍន៍មូលដ្ឋានរបស់យើងធ្វើទៅតាមថវិកាមូលនិធិរបស់សង្កាត់ និងថវិកាខណ្ឌ ព្រមទាំងការផ្តល់នូវសមិទ្ធិផលដែលជាថវិការបស់សាលារាជធានីភ្នំពេញ ផ្តល់ជូនដល់ប្រជាពលរដ្ឋតាមសង្កាត់ទាំង៨ របស់យើង មាន៤៩ភូមិ ក្នុងនោះដែរមានភូមិតាព្រហ្ម របស់យើងបានទទួលបានសមិទ្ធិផលនេះ។
លោកអភិបាលរង ណុប ផា បានបន្ថែមថា យើងធ្វើជាប្រចាំ ធ្វើដើម្បីប្រជាពលរដ្ឋរបស់យើង និងចុងក្រោយលោក សំណូមពរដល់ប្រជាពលរដ្ឋទាំងអស់នាំគ្នាជួយថែរក្សានូវសមិទ្ធិផលដែលយើងទទួលបានផង ៕ សណ្តោស
