ខេត្តកំពង់ស្ពឺ: បុរសជាម្ចាស់រថយន្តបានបើករថយន្តដេញតាមចាប់ស្រ្តី២នាក់និងបុរសម្នាក់ដែលជិះម៉ូតូគេចខ្លួន យកទៅប្រគល់ឲ្យសមត្ត្ថកិច្ចចាត់ការតាមច្បាប់ បន្ទាប់ពីអ្នកទាំង៣នេះយកសំបកដូងគប់កញ្ចក់រថយន្តរបស់គាត់បែកខ្ទេច។

ហេតុការណ៍នេះកើតឡើងកាលពីវេលាម៉ោង ៣និង២០នាទីយប់ ឈានចូលថៃ្ង ថ្ងៃ ពុធ ៣ កើត ខែកក្តិក ឆ្នាំ កុរ ឯកស័ក ព.ស.២៥៦៣​. ត្រូវនឹងទី៣០ ខែតុលា ឆ្នាំ២០១៩ នៅតាមបណ្ដោយផ្លូវជាតិលេខ៣ ភូមិក្រាំងលាវ ឃុំព្រៃវិហារ ស្រុកគងពិសី ខេត្តកំពង់ស្ពឺ។

ជនសង្ស័យទាំង៣នាក់ដែលម្ចាស់រថយន្តតាមចាប់ខ្លួនបានយកទៅប្រគល់ឲ្យសមត្ថកិច្ចនោះមាន
១-ឈ្មោះ ជួន វិន ភេទប្រុស អាយុ ២៣ឆ្នាំ ជាអ្នកបើកម៉ូតូ រស់នៅភូមិឯកភាព ឃុំព្រៃវិហារ ស្រុកគងពិសី ខេត្តកំពង់ស្ពឺ ។
២-ឈ្មោះ ឡេង ស្រីកា ភេទស្រី អាយុ ១៩ឆ្នាំ អ្នករួមដំណើរ រស់នៅភូមិព្រៃស្តី ឃុំម្លប់ស ស្រុកសំពៅមាស ខេត្តពោធិ៍សាត់ បច្ចុប្បន្នបំរើការងារ ពេលរាត្រី នៅហាងខារ៉ាអូខេ យីហោរាត្រីពណ៌ស្វាយ ស្ថិតក្នុងភូមិព្រៃកេស ឃុំព្រៃវិហារ ស្រុកគងពិសី ខេត្តកំពង់ស្ពឺ ។
៣-ឈ្មោះ ចាន់ លក្ខិណា ភេទស្រី អាយុ ២៣ឆ្នាំ អ្នករួមដំណើរ រស់នៅភូមិព្រៃត្រាង ឃុំមានជ័យ ស្រុកឈូក ខេត្តកំពត បច្ចុប្បន្នបំរើការងារពេលរាត្រី នៅហាងខារ៉ាអូខេ យីហោ រាត្រីពណ៌ស្វាយ ស្ថិតក្នុងភូមិព្រៃកេស ឃុំព្រៃវិហារ ស្រុកគងពិសី ខេត្តកំពង់ស្ពឺ ។ ជនសង្ស័យទាំង៣នាក់ជិះម៉ូតូឌុបគ្នាម៉ាក ហុងដា សេ១២៥ ពណ៌ខ្មៅ ស៊េរីឆ្នាំ២០១៩ ពាក់ស្លាកលេខកំពង់ស្ពឺ 1K-0404 ។ រីឯជនរងគ្រោះឈ្មោះ វ៉ែន វី ភេទប្រុស អាយុ ៣៧ឆ្នាំ មានទីលំនៅ ភូមិសេកយៀ ឃុំអង្គត្នោត ស្រុកត្រាំកក់ ខេត្តតាកែវ ។

មន្រ្តីនគរបាលស្រុកគងពិសី បានឲ្យដឹងថា មុនពេលកើតហេតុជនសង្ស័យទាំង ៣នាក់ បានធ្វើដំណើរមកដល់ចំណុចកើតហេតុ ស្ថិតតាមបណ្តោយផ្លូវជាតិលេខ៣ ជិតប៉ុស្តិ៍នគរបាលរដ្ឋបាលក្រាំងលាវ មិនដឹងមានរឿងហេតុអ្វី ស្រាប់តែធ្វើសកម្មភាព យកផ្លែដូងដែលផឹកទឹកអស់គប់ទៅលើរថយន្ត សណ្តោងរ៉ឺម៉កមួយគ្រឿង ពាក់ស្លាកលេខព្រះសីហនុ 4A-8899 បើកបរដោយខាងលើបណ្តាលឲ្យរថយន្តបែកកញ្ចក់ផ្នែកខាងមុខ។

ក្រោយកើតហេតុជនបង្កបានជិះម៉ូតូគេចខ្លួនចូល មកភូមិសាស្រ្ដស្រុកបសេដ្ឋ តែត្រូវអ្នកបើកបររថយន្ត ដេញតាមរហូតមកទាន់នៅចំណុចផ្ទះសំណាក់ យីហោ ហេងលី ស្ថិតនៅភូមិត្រពាំងខ្យង ឃុំទួលអំពិល ស្រុកបសេដ្ឋ ខេត្តកំពង់ស្ពឺ រាយការណ៍ជូនសមត្ថកិច្ចមូលដ្ឋានមកឃាត់ខ្លួនបានទាំង៣នាក់តែម្ដង ។

បច្ចុប្បន្នមុខសញ្ញាជនសង្ស័យប្រុសស្រី ៣នាក់ នេះត្រូវបានសមត្ថកិច្ចនគរបាលស្រុកគងពិសី សាកសួរ និងកសាងសំណុំរឿងបញ្ជូនចាត់ការតាមនីតិវិធី ៕